Импресивна книга за раскошната убавина на македонскиот пејзаж
Во рамките на „Скопско лето“, вчера во Мултимедијалниот центар „Мала станица“ беше промовирана книгата „Мојот балкански дневник“ од Џ. Џонстон Абрахам. Книгата е издание на Дирекцијата за култура и уметност, а изборот и преводот од англиски јазик се дело на д-р Владимир Цветковски.
Авторот на делото Џ. Џонстон Абрахам е хирург што дошол во Скопје во октомври 1914 година, во составот на лекарската екипа што ја испратил Британскиот црвен крст и останал до март 1915 година. Во книгата ги опишува секојдневните сложени операции што ги извршувале во болницата сместена во едно од скалдиштата за тутун недалеку од железничката станица, најверојатно денешниот културен центар „Мала станица”. Она што најмногу импресионира се инспиративните описи на градот, Старата чаршија со бројните тогашни занаети, црквата „Св. Спас“, Куршумли-ан, Даут-пашиниот амам, посетата на селата Горно и Долно Водно, раскошната убавина на македонскиот пејзаж, светењето на водите на Водици, кинопретставите во кафеаната „Зрински“. Книгата ја претставија Благоја Иванов и Иван Џепаровски. (Н.П.) |
