Претходен број

И новата влада ќе биде изгласана без опозицијата?

По Деловникот, голема веројатност владејачките партии сами да си ја изгласаат и новата влада

Светлана Унковска

Парламентарното мнозинство, најверојатно в сабота, за кога е закажана седницата на Собранието за изгласување на новата Влада, повторно ќе остане без гласовите на опозицијата. Ова вчера го потврдија од СДСМ, кои велат дека постојат многу мали шанси тие в сабота да се вратат во Собранието. Сепак, додаваат и дека конечната одлука за тоа како ќе постапат при изборот на новиот владин кабинет ќе ја донесат на седницата на Извршниот одбор на партијата, што беше закажана за синоќа во Струмица.

Откако владејачкото мнозинство во петокот, кога претходно опозицијата го напушти парламентот, го донесе новиот Деловник за работа на Собранието, чашата се прелеа и сега постои голема веројатност владејачките ВМРО-ДПМНЕ, ДУИ и ПЕИ без никаква расправа сами без присуство на опозицијата да ги притиснат зелените копчиња и да си ја изгласаат и новата Влада. Ваквите најави за бојкот на изборот на новиот владин кабинет вчера не сакаа да го коментираат од ВМРО-ДПМНЕ. Никој од оваа партија не чувствуваше за потребно да одговори како ќе се гласа Владата без да присуствува опозицијата и да расправа и дали ова за нив ќе значи и големо назадување на вкупните демократски процеси во државава. Од ДУИ велат дека не би сакале да ги видат празни столчињата на пратениците од опозиционите партии и оти би било добро и тие да бидат присутни кога ќе се гласа новата Влада. Сепак, му оставаат на мандатарот Никола Груевски да им упати апел за прекин на бојкотот и да ги повика да присуствуваат на седницата.

Демократската унија за интеграција се' уште не може да се соземе од начинот на кој ВМРО-ДПМНЕ експресно го протурка новиот Деловник за работа на Собранието, кој вчера и официјално стапи во сила. Во партиските редови на интегративците постои поделеност и врие од незадоволство поради несогласувањата на дел од партиското раководството, како и од членовите на ДУИ, порад�� тоа што со ваквото решение на собранискиот правилник не се унапредува употребата на албанскиот јазик во Собранието. Потпретседателот на партијата Теута Арифи во својата последна колумна остро го нападна начинот на кој владејачката ВМРО-ДПМНЕ ја практикува, како што вели, таа „демократурата“ и „автократскиот начин на поимање на парламентот, кои водат кон демократура, како прв чекор до вистинска диктатура“. Вметнувањето на Деловникот како точка на дневниот ред таа оцени дека е направено по „шверцерски систем“ и дека „документот што е код на однесување на сите партии во Собранието најмалку заслужува да биде третиран како шверцувана стока на пазар“.

Вчера и СДСМ реагираше дека носењето на Деловникот без присуство на опозицијата е преседан кој не е забележан во ниту една демократска држава и дека по овој настан, најверојатно, и изгласувањето на Владата оваа сабота ќе биде без нив.

Но, дали овој „шверцуван“ Деловник ќе предизвика силен потрес во партијата на Али Ахмети и раскол во пратеничките редови на ДУИ? Новиот координатор на пратеничката група на ДУИ Тахир Хани вчера ретерираше од петочната реакција кога изрази голема нервоза за изгласувањето на собранискиот правилник и смирува дека во редовите на нивната пратеничка група воопшто нема поделеност и неусогласеност на ставовите, а написот на потпретседателката на партијата Арифи го оцени како нејзин личен став, а не партиски.

„Постои апсолутно единство во нашите редови и мислам дека усвоениот Деловник на Собранието во доменот на член 3 не е лимитиран во употребата на албанскиот јазик и начелно тој член ќе функционира онака како што ќе се усвои законот за употребата на јазиците, а убеден сум дека тој закон ќе дава можност во Собранието албанскиот јазик да се употребува на соодветен начин“, тврди Хани. Токму овој член беше причина зошто неколку собраниски комисии со години не работеа затоа што нивните претседатели кои беа од редовите на ДПА и на ДУИ и тоа кога беа во опозиција бараа седниците да ги водат на албански јазик. За ова на лидерските средби беше постигнат договор, но во петокот мнозинството во парламентот ја донесе старата верзија на собранискиот правилник.

Иако ДУИ важи за многу отворена партија, вчера никој друг не сакаше да ги коментира внатрепартиските состојби по петочната седница.

Социјалдемократите кои работата на Собранието ја напуштија во знак на протест поради притворањето на потпретседателот Зоран Заев и поради кршењето на Деловникот, бидејќи парламентот носи закони предложени од техничка влада, коментираат дека со тоа што мнозинството го изгласа Деловникот без опозицијата покажува дека ВМРО-ДПМНЕ не сака да ја види опозицијата во Собранието.

„Тие донесоа партиски Деловник и затоа македонското Собрание остана без опозиција. Со нашиот протест само го вклучуваме алармот дека во Македонија се уништува демократијата и се инсталира партиско-полициска држава“, вели Емилијан Станковиќ од СДСМ, според кого колумната на Теута Арифи од ДУИ ја оценува како реакција поради „силувањето на демократијата од страна на ВМРО-ДПМНЕ“.