Претходен број

ОМО „Илинден“ – ПИРИН во петти обид да се регистрира

За да го потврди почитувањето на законот, партијата одржа нова конститутивна седница со 500 делегати

Партијата на Македонците во Бугарија ОМО „Илинден“ - ПИРИН најдоцна за 14 дена ќе знае дали петтиот обид да биде регистрирана како политичка партија ќе и' биде успешен.

Најдоцна за две недели судот треба да се произнесе за пререгистрација на ОМО „Илинден“ - ПИРИН, која досега четири пати Софискиот главен суд, надлежен за регистрација на политичките партии во Бугарија, ја одбива со образложение дека не е испочитувана процедурата за формирање на партијата.

Ботјо Тиков, претставник на партијата, за „Утрински весник“ изјави дека се надеваат дека овој пат судот ќе ги испочитува препораките од Судот за човекови права во Стразбур за регистрација на партијата и ќе го уважи новото конститутивно заседание на партијата, причина поради која последниот пат беше одбиена нејзината пререгистрација.

Судот во октомври минатата година го отфрли барањето со забелешка дека конститутивното собрание на партијата немало доволен број делегати.

Во октомври оваа година ОМО „Илинден“ - ПИРИН одржа нова конститутивна седница со присуство на 500 делегати, како што налагаат бугарските закони, но овој пат во присуство на претставници на организации за човекови права, како потврда на законитоста на седницата.

Софискиот суд вчера ја разгледуваше молбата на македонското малцинство во Бугарија за регистрирање негова политичка партија, поднесена пред повеќе од еден месец. (Т.Г.)