Претходен број

На истокот повеќе ништо не е исто

ВМРО-ДПМНЕ е на пат да ги освои сите општини во источна Македонија

Иван Бојаџиски



Штип - Политичката карта на истокот од Македонија се сврте за 180 степени. Левата коалиција, која пред последните локални избори на овој простор од тринаесет општини имаше градоначалници во девет, а ВМРО-ДПМНЕ во само две, доживеа тотално фијаско. Во првиот изборен круг владејачката партија со коалицијата веќе доби шест градоначалници, освојувајќи ги притоа и двете најголеми општини - Штип и Кочани. Во преостанатите седум општини владејачката партија освои повеќе гласови во пет општини, а СДСМ во Берово и во Карбинци. Сосема е реална можноста, со оглед на состојбата на теренот на кој доминираат членови на владејачката партија кои ги „обработуваат“ гласачите, по завршувањето на изборите ВМРО-ДПМНЕ да ја освои власта во сите тринаесет општини.

ВМРО-ДПМНЕ веќе има градоначалници во Виница, Кочани, Пехчево, Штип, Свети Николе и во Пробиштип. Неговите кандидати стекнаа предност во првиот круг во Делчево, Македонска Каменица, Зрновци, Чешиново-Облешево и Лозово.

Во Штип кандидатот на ВМРО-ДПМНЕ, Зоранчо Алексов, победи во првиот круг со 2.500 гласа повеќе во однос на својот главен конкурент Здравко Коцев од СДСМ. Иронијата на штипската приказна е во тоа што Коцев, за кого гласаа 12.475 избирачи, го направи најдобриот резултат за СДСМ во историјата на изборите за градоначалник во изминатите 18 години, и тоа без поддршката која оваа партија порано ја имаше од десетина коалициски партнери.

Но, и тоа не беше доволно да се спротивстави на владејачката машинерија која во своите раце ги имаше сите можности - од многу пари до голема логистика во околу илјада лица вработени во државната управа и на Универзитетот „Гоце Делчев“ во последниве три години. Таа „илјадарка“ во старт му носеше на ВМРО-ДПМНЕ предност од четири до пет илјади гласа. Во Советот на општината ВМРО-ДПМНЕ со 13 од вкупно 23 советници го има мнозинството наспроти СДСМ со 7, ВМРО-НП со 2 и НСДП-1. Димитар Ефремов, поранешен градоначалник од СДСМ, стана советник на листата на НСДП.

Новиот кочански градона��алник Ратко Димитровски, во вториот обид успеа да урне две локални политички предрасуди. Прво, дека градот на оризот е сдсмовската тврдина која никогаш нема да попушти и втората, дека Кочани никогаш нема да прифати „странец“ за градски татко. Димитровски е од Делчево и на претходните локални избори кои ги загуби од Љубомир Јанев, како главна негова „мана“ се наведуваше неговото делчевско потекло. Сепак, сопственикот на печатницата „Европа 92“ и довчерашен пратеник, ќе остане забележан во политичката историја на овој град како прва личност која докажала дека бастионот не е неосвоив. Во овој град допрва ќе се види кој ќе владее со Советот на општината. ВМРО-ДПМНЕ има 8, СДСМ-7, ВМРО-НП-2, ЛДП и СДПМ-1. Во кочанската изборна приказна се појави фамозниот Бранко Јаневски со неговата СДПМ освојувајќи едно советничко место, што не му успеа во ниту една друга општина.

В недела, на вториот изборен круг, ќе се води жестока битка за освојување на градоначалничките места во преостанатите седум општини. Владејачката партија посебно ќе атакува на Делчево со цел да го детронизира неприкосновениот локален авторитет Мирко Иванов, кој сиве овие години е или градоначалник или пратеник. Трн во око на владејачката партија е и Берово, општина во која осумнаесет години е со поголема доверба кон СДСМ, и во малите општини Карбинци и Лозово во кои досега ВМРО-ДПМНЕ никогаш не победувал.

„Активисти на ВМРО-ДПМНЕ наголемо се присутни во нашава општина, применувајќи ги сите дозволени и посебно недозволени активности за освојување на власта. Новоизбраниот штипски градоначалник е постојано на овој терен, се врши една голема психолошка тортура врз населението, во функција е ставено се' од најава на големи проекти преку закани до пари“, вели Јордан Павлов од СДСМ, досегашен градоначалник и актуелен претендент за оваа функција во Општина Лозово. Информации за иста технологија на „освојување“ на гласачите од владејачката партија доаѓаат и од другите општини. Каков ќе биде расплетот, ќе се види веќе в недела.