Македонците го оспоруваат бугарскиот попис

За македонските здруженија во Бугарија, резултатите од пописот се изманипулирани

Македонците во Бугарија нема да ги признаат за официјални резултатите од пописот во Бугарија. По инцидентите со граѓаните што се декларирале како Македонци на пробниот попис, македонските организации во Бугарија се убедени дека конечните резултати од пописот во март ќе бидат манипулирани и недемократски.

Како што ни изјави Стојко Стојков, претседател на Здружението ОМО „Илинден“-ПИРИН, скандалозното казнување на граѓаните што ја пополниле графата „Македонец“ во списоците за попис е само еден од редот активности во Бугарија за да се испрати јасна порака дека се ограничува правото на самоопределба. Стојков нагласува биле испратени јасни пораки, дури и од министерот за дијаспора, Божидар Димитров, дека нема да има графа со националност „Македонец“ во пописниот список, како и дека нема да има толеранција за такви малцинства при пописот. На овој начин, како што вели Стојков, отворено се ограничува правото на самоопределба во Бугарија.

„Пописот е веќе компромитиран и ако не се направи нешто, ако не се преземат конкретни мерки, ние ќе ги оспориме официјалните резултати“, нагласи Стојков. Претседателот на ОМО „Илинден“-ПИРИН заедно со уште три македонски здруженија испратил декларација до сите амбасади и меѓународни организации што ќе го следат пописот во која се образложува дека резултатите од новиот попис ќе бидат изманипулирани. Стојков нагласи дека во никој случај нема да бидат прифатени притисоците, а резултатите ќе ги прогласат за неточни и изманипулирани.

Новиот попис за Стојков ќе биде само повторување на сценаријата од претходните два пописа кога резултатите биле изманипулирани. Казнувањата и отпуштањата на граѓаните што се изјасниле како Македонци ги гледа само како начин да се заплаши македонското малцинство, што во минатото се покажало како успешно. Според Стојков, најмногу за казнувањата од пробниот попис стравуваат граѓаните вработени во државната администрација. „На првиот попис околу 10.803 лица се декларираа како Македонци, додека веќе на вториот, заплашени од казнувањата и заканите, како Македонци се декларираа само 5.700 граѓани“, вели Стојков, тврдејќи дека и во минатото и сега преку медиумите отворено се упатува закана до македонското малцинство во Бугарија. Како пример за овие закани ја посочува и полициската истрага што била поведена против „ОМО Илинден“, а била постојано јавно пренесува преку медиумите.

До скандалот со слободата за самоопределување во пописот дојде откако беше откриено дека на попишувањето што ќе се спроведува преку Интернет им нуди на граѓаните да се декларираат и како Македонци. Веднаш беше поведена истрага по налог на премиерот Бојко Борисов за одговорноста за ваквиот состав на пописниот лист, што доведе до отпуштање на тројца, директорката и нејзини заменици од Националниот институт за статистика. (Н.Р.)