Претходен број

Иванов го омекнува тонот на ВМРО-ДПМНЕ спрема Атина

Пораката на Иванов за средба со претседателот на Грција е промена во кампањата на десницата

Соња Крамарска

Претседателскиот фаворит Ѓорге Иванов на својот прв предизборен митинг ја упати една од најсериозните пораки во врска со идните политички случувања во и околу нашата земја. Тој рече дека доколку биде избран за претседател ќе побара средба со претседателот на Грција.

"Ќе одржувам пријателски односи со соседите на Македонија а една од првите средби што ќе ја одржам доколку бидам избран за претседател ќе се потрудам да биде со претседателот на Грција", рече Иванов.

Оваа порака на адутот на владејачката десница за нов шеф на државата, доколку нема само предизборна употреба кон странските дипломати во земјава, може да значи пресврт во кампањата на ВМРО-ДПМНЕ за претседателските избори.

Самиот Ѓорге Иванов во неговото прво интервју за македонските иселеници во Мелбурн, Австралија, само пред три седмици ќе порача дека "уставното име на Македонија ни е дадено од нашите дедовци и прадедовци и треба да биде зачувано".

Тогаш, која е поентата на Иванов за средба со грчкиот претседатела. Дали тој, по серијата разговори со највлијателните амбасадори во земјава ги доби насоките по кои треба да се движи идниот претседател на Македонија. Или пак можеби лидерот на ВМРО-ДПМНЕ и актуелен премиер Никола Груевски одлучи да ги даде првите сигнали за спуштање на топката кон Грција преку "новото лице" на неговата партија Ѓорге Иванов.

Тоа се анализи кои веројатно во идните денови ќе добијат на интензитет ако изјавата не била само предизборен блеф со краток здив. Во меѓувреме, да дадеме неколку корисни потсетувања. Доколку навистина биде избран за претседател, а анкетите засега се во негова корист, Иванов во својот грчки колега Каролос Папуљас нема да пронајде само сог��ворник од спротивставениот сосед на Македонија, туку и угледен доктор по меѓународно приватно право кој се образувал во Атина и во Минхен.

Но, она за што идниот македонски претседател Иванов треба добро да се подготви, е фактот што Каролос Папуљас е неколкукратен шампион на грчката дипломатијата и стар волк во надворешната политика на нашиот јужен сосед. Неговите услуги меѓу другото се користени во израелско-палестинскиот конфликт во '80-тите години, подобрувањето на односите меѓу Грција и Египет, пристапните разговори на Кипар со ЕУ а беше и член на контакт групата за поранешна Југославија заедно со Ворен Кристофер, Клаус Кинкел и другите.

Она што е најважно е дека Папуљас е министерот за надворешни работи на Грција што заедно со македонскиот колега Стево Црвенковски ја потпишаа Времената спогодба меѓу Македонија и Грција во 1995 година, која што сега е предмет на судски спор што го иницираше Скопје пред Меѓународниот суд во Хаг. Оттука, Папуљас е еден од најупатените за содржината на Спогодбата и за тоа дали истата е прекршена од страна на Атина со попречувањето на Македонија да добие покана за членство во НАТО минатата година во Букурешт. Папуљас, кој годинава полни 80 години се смета за легенда на ПАСОК, и еден од најдоверливите соработници на таткото на Јоргос Папандреу, Андреас Папандреу.

Се разбира, се уште е рано да се предвидува дали навистина ќе дојде до средба меѓу новиот македонски претседател (кој и да биде избран) и неговиот грчки колега, особено ако се знае дека актуелната грчка шефица на дипломатијата Дора Бакојани во својство на претседавач со ОБСЕ ги посети сите земји од регионов а намерно ја заобиколи Македонија.

На македонската страна, како и да е, и останува добро да се подготвува за средбите со своите грчки соговорници бидејќи е воочливо дека на политичката сцена во Скопје доминираат млади и неискусни луѓе во споредба со политичките тешкаши на Атина.