Претходен број

ЕДИТОРИЈАЛ

Рецепт за авторитарност

Билјана Јовановска

Нема дилеми: ниту една власт досега не злоупотреби нечие легитимно право на штрајк на таков начин на кој деновиве го прави тоа Владата на премиерот Никола Груевски. Владата покажа запрепастувачко отсуство на демократски капацитет, одбивајќи да се соочи со легитимните барања на Синдикатот на вработените во образованието и културата (СОНК) за поголеми плати, за зголемување на износот на превозот и хранарината... Контранападот беше според урнекот од авторитарните министерства за пропаганда. Уште во неделата на цели шест страници Владата стокми обраќање до граѓаните со многу проѕирна цел - да предизвика гнев и револт кај оние кои не се вработени во образованието, бидејќи, ете, токму сега, кога светот се соочува со економска криза, најголема во последните 80 години, некој се дрзнува да бара поголем надомест за својот труд! Без малку, преку леб - погача!

И, за аргументите контра закажаниот штрајк да им бидат поиздржани и со поголем ефект, соопштуваат дека бројот на вработените во САД е намален за 1.200.000 работници, дека без работа останале и оние од светските гиганти - 3.500 во „Пежо“ и „Ситроен“ во Франција, илјадници луѓе од германски „Мерцедес“ и „Луфтханза“, 1.600 од холандскиот „Филипс“... Да ти запре здивот. Не дека бројките не се точни, туку бесрамноста на Владата ја помина границата поради поттекстот: демек, вие од образованието, седете си мадро зашто истата судбина може да ве снајде и вас. И не само вас!

Без затскривање и срам, тимот на Груевски се пушти дури и во директни притисоци врз дел од директорите и наставниците да не штрајкуваат и отворено да се оградат од СОНК, како ним да не им требаат плати. Во тоа делумно успеа, зашто најсилното оружје му е стравот. Влече потези кои не најавуваат ни демократска ни европска иднина, туку авторитарен режим. И, што е многу загрижувачки, власта упорно игра на картата дека народот има кусо паметење, па секој ден преку спотови сака да му продаде рог за свеќа. Па, зар народот е глупав и слеп, па не го гледа владиното енормно расипување со парите од буџетот, со нашите пари, за себерекламирање. Колку вчера, луѓе од културата, на нивните спотови од ТВ-екраните се фалеа дека платите им се зголемени за 60 отсто! Да нема забуни, никој не вели дека примањата на актерите не требаше да се зголемат, ама да бидеме реални - и тие припаѓаат во истиот Синдикат. Но, вака свежо „опарени“, сега велат дека немаат мотив за незадоволство! Браво! Подели, па владеј!

Ајде што на вработените од образованието најфлагрантно им го скратува право��о на штрајк, туку владејачката гарнитура промовира и свои бисери. Така, министерот Перо Стојановски, првиот ден од штрајкот, го соопшти својот изум: „И кога се штрајкува, треба да се работи“! И без трошка срам, појасни каде се случува тоа: „Во МРТ“! Каков мајтап со човечки судбини.

Владата заборава дека ќе остане забележана во историјата на државата како најголем „производител“ на рекламни кампањи, спотови, акции за себевеличање, за кои троши милиони евра. До вчера не' убедуваа дека светската криза ќе ја заобиколи Македонија. Но, поради една единствена потреба - штрајкот на просветните работници власта сега тврди дека и нас не' закачила светската криза.

Многу поопасна е и уште една порака која Владата преку јавното обраќање им ја праќа на граѓаните. Посочувајќи дека светската економска криза го зафати и регионот на Југоисточна Европа, укажува дека „во Романија во последните месеци 170.000 работници изгубиле работа, а слично е и во Бугарија“. Перфидна порака, нема што: биди среќен народе што не сме во ЕУ, зашто гледај каков хаос и безработица ги закачи нивните членки. Уживај во изолацијата и молчи.

Овој штрајк на просветарите е најголемото искушение дома за Владата на Груевски. Затоа тој треба да се скрши на парчиња за другите да не помислат на такво нешто. Во светлата иднина што не' чека, наводно, не смее да се случуваат вакви работи.