МРТ ја откажува „Отворено со народот“

Емисијата заедно со водителот се прославија откако Томиќ го нарече Груевски „пастир на македонскиот народ“

Светлана Унковска


Емисијата „Отворено со народот“ на Слободан Томиќ од јули нема да се емитува на програмата на Македонската телевизија. Ваквата одлука ја донел Советот на МРТ на завчерашната седница откако едногласно било решено да не се продолжи договорот со продукциска куќа на Томиќ, „Кралот Александар Македонски“, кој истекува на трети јули. Одделни членови на Советот предложиле да се раскине договорот веднаш, но со оглед на тоа што договорот завршува за само две-три недели, одлучено е тој да не се продолжува.

Претседателот на Советот, Миодраг Игњатовиќ, за „Утрински“ ги потврди овие информации и образложи дека одлуката е донесена поради тоа што рејтингот на емисијата на Томиќ бил многу низок, дека не е соодветна за националниот сервис, но и дека не го остварува јавниот интерес на граѓаните. Оттаму ги отфрлаат како неточни информациите дека МРТ за откуп на авторските права за емитување на Томиќ му инкасирала 90 илјади евра.

„Точно е дека Советот ја донесе одлуката да не го продолжи договорот за емитување на ’Отворено со народот’ на Слободан Томиќ. Ние размислувавме дури и да го прекинеме договорот, но бидејќи набрзо истекува, одлуката беше да не се продолжува. Добивме и мислење од програмскиот уредник дека рејтингот на емисијата е мошне низок и освен тоа дека таква емисија не е соодветна за јавниот сервис на граѓаните“, ни изјави Игњатовиќ.

За неколкумина членови на Советот изненадување било што за одлуката да не се продолжи договорот гласале сите, иако во неа членуваат лица блиски до десницата. Емисијата заедно со водителот се прославија откако во јавноста се дозна за писмото со кое Томиќ го поканил премиерот Никола Груевски да учествува во емисијата. Во него Груевски бил наречен како „пастир на македонскиот народ“, а било наведено и дека како гости во емисијата можеле да се јавуваат граѓани со договорени прашања, кои ќе ги обезбедел Центарот на комуникации на ВМРО-ДПМНЕ.

Претседателот на програмската комисија Иван Бојаџиски вели дека ова тело со години поднесувало иницијативи Советот да ја тргне од етерот, бидејќи контроверзноста на самата емисија, но и уште поконтроверзниот водител Томиќ го уривале угледот на МРТ.

„Нашата комисија две години водеше активност за да се симне емисијата, бидејќи никогаш не го остварувала јавниот интерес. Гледаноста е со просек од 1,3 проценти или на ниво на Македонија е гледана од 25 илјади луѓе. Само во Скопје просекот е 6.500 лица што покажува дека не допрела и дека нема интерес кај граѓаните. За исклучителна ниска се смета кога гледаноста е под 3 проценти и таквиот проект е неуспешен“, вели Бојаџиски, кој вели дека информации се добиени од Аналитичкиот сектор на МТВ, кој прави истражувања на програмските содржини.

Програмскиот уредник, Алјоша Симјановски смета дека терминот што го имал „Отворено со народот“ треба да се искористи со нов вид емисија и на тој начин телевизијата вистински ќе се отвори кон граѓаните.

„Нема потреба да давам мислење за емисија, која авторот ја користеше за сопствена промоција. Новата концепција е да се направи телевизијата отворена кон граѓаните“, вели програмскиот уредник Аљоша Симјановски.

Емисија и претходно се емитуваше под насловот „Гласот на народот“. Откако беше повлечена, по извесен период се склучи новиот договор, за чија промоција на „Отворено со народот“ беа закупени многу билборди. Набргу потоа, во јавноста протекоа информации дека МРТ за правата на Томиќ му платила 90 илјади евра. „Финансискиот дел го обезбедуваше самиот и не се точни гласиштата дека се дадени илјадници евра. Ниту еден денар не му е даден, тоа се шпекулации“, тврди Игњатовиќ.