Граѓаните ќе плаќаат за миење на улиците

Висината на новата такса допрва ќе се утврдува и веројатно ќе биде вградена во сметките за ѓубрарина

Сања Наумовска

Скопјани во иднина ќе плаќаат и за одржување на хигиената на улиците според примерот на главните градови во соседството. Градоначалникот Коце Трајановски најави дека на една од следните седници Советот на Скопје ќе треба да го разгледа ова прашање и доколку одлучи да им наметне нова давачка на граѓаните, ќе треба да ја одреди и нејзината висина. Новата такса, веројатно, ќе биде вградена во сметките за ѓубрарина.

Со новата давачка ќе се финансира јавното претпријатие „Комунална хигиена“, кое има обврска рачно и машински да ги мете и да ги мие улиците. Ваква давачка скопјани плаќале пред дваесетина години, а пред две години повторно се воведува како законска обврска, слична на онаа за јавно осветлување, која исто така ја плаќаат граѓаните преку сметките за струја.

Надоместокот за јавна чистота на сообраќајниците е предвиден во Законот за управување со отпадот и „Комунална хигиена“ бара од градската власт да започне со наплатата. Моментно, одржувањето на улиците се финансира од парите што ги плаќаат граѓаните за собирање на сметот од домаќинствата. Според директорот на „Комунална“, Ракип Дочи, тие средства не се доволни, а како илустрација го посочува Загреб, чие јавно претпријатие за оваа намена од градскиот буџет добива 16 милиони евра годишно.

„Градските улици се метат и се мијат во три смени, за што се ангажираат работници и цистерни. Оваа дејност била финансирана преку посебна такса до 80-тите години од минатиот век кога е укината. Оттогаш ниту градската власт не го покрива овој трошок, што не е случај во градовите во соседството, па дури и кај нас, бидејќи во Куманово граѓаните плаќаат ваква давачка“, вели Дочи.

Тој објаснува дека со оглед на тоа што „Комунална“ ја одржува јавната хигиена на градските улици, собраните средства ќе треба да се делат со општините, кои, пак, ќе бидат задолжени за чистење на општинските сообраќајници. Дочи вели дека постојат повеќе методологии за одредување на висината на надоместокот, но крајната одлука ќе биде на Советот на Скопје.

Тој потенцира дека во ревизорските извештаи за работењето на Јавното претпријатие од 2008 година како забелешка ревизорот побарал „Комунална хигиена“ да ја воведе давачката како еден од изворите на финансирање, бидејќи има законска основа за тоа, а на тој начин и ќе ја подобри својата финансиска состојба.