Премиерот не сака помош од никого

Груевски одби договор за партнерство околу името, Рамковниот и за статусот на борците на ОНА

Оливера Војновска


Премиерот Никола Груевски, не сака да ја подели одговорноста со Собранието за трите важни прашања што ја електризираат политичката клима во државата: името, разликите околу Рамковниот документ и статусот на бранителите и борците на ОНА. Груевски вчера го одби предлогот на лидерот на НСДП, Тито Петковски, сите партии што се застапени во парламентот да потпишат договор за партнерство, и како што рече тој, да ја споделат одговорноста за овие суштински прашања.

Петковски на вчерашната седница за пратенички прашања констатира дека премиерот води политика на неединство и ја турка Македонија на слеп колосек во однос на евроатланските интеграции. А консеквенците од тоа ќе бидат бесперспективност и длабоки поделби меѓу Македонците и меѓу Македонците и Албанците. Тој оцени дека треба да се случи некакво чудо, нешто спектакуларно за да добиеме датум во јуни за почеток на преговорите со ЕУ. „Името е главниот проблем, иако има и други прашања каде што значително заостануваме. Сите активности на Владата укажуваат дека нема никакви шанси Македонија да добие датум за преговори“, убеден е Петковски.

„Не е проблем договорот, проблем се позициите. Во овој период се виде дека за некои прашања имаме различни позиции, посебно за проблемот со името што го наметна нашиот јужен сосед“, изјави Груевски, одговарајќи на прашањето на Петковски. Потоа тој уште еднаш повтори дека проблемот е во големите разлики и додаде „ако успееме да ги изедначиме позициите немаме никаков проблем да потпишуваме договори“.

Незадоволен од одговорот на премиерот, Петковски ваквиот негов настап го оквалификува како „катастрофален, крајно неодговорен и недржавнички“.

„Вие апсолутно одбивате да разговарате за овие фундаментални прашања. Јас не сугерирав решение, туку предложив да постигнеме национално единство. Сите партии во парламентот да седнеме и да најдеме заедничко решение за прашања кои силно ја обременуваат не само внатрешната туку и надворешната политика. Со вакво арогантно однесување вие испраќате имплицитна порака: ние сме татковината“, рече Петковски. Посочувајќи го слоганот за дваесетгодишнината на ВМРО-ДПМНЕ, „за татковината се работи“, тој иронизираше „не се работи за татковината, туку за вашите пари“.

Груевски, пак, смета дека коментарот на Петковски за слоганот на ВМРО-ДПМНЕ произлегува од неговата лична желба за власт и пари. „Не знам дали Петковски има исто такво мисле��е и за сите граѓани што размислуваат како нас за името. Жал ми е ако е така, бидејќи се работи за заблуда и за замена на тези. Односно, своите желби тој ги претставува како желби на некој друг“, возврати Груевски.

Претходно премиерот го смируваше потпретседателот на Собранието, Јани Макрадули од СДСМ, да не се грижи затоа што „речиси цела недела не фрлил ниту една лопата“.

„Тоа што не се појавував во медиумите, не значи ништо. Јас сум тука, на работа во постојан контакт со МВР и ги следам состојбите“, уверуваше Груевски. Макрадули го праша премиерот дали чувствува лична одговорност за „крвавата недела“ и порастот на криминалот во земјата. „Беснеат друмски разбојници и пљачкашки банди како во Сомалија. Вашето лично обезбедување има возен парк од стотици илјади евра и тепа деца по улица. МВР е на колена. Се претвори во бројач на жртви и собирач на чаури“, рече тој.

Груевски смета дека Макрадули има погрешна статистика и дека МВР си ја работи својата работа. „Статистиката по ова прашање не оди во прилог на она што го искажува Макрадули. Значаен дел од случаите се решени, други се во тек. Ако се погледа ефектот на МВР во минатиот период, ќе се види дека има висок процент на успех каков што не е забележан во изминатите години“, рече Груевски.

Револтиран поради одговорот на премиерот, Макрадули од говорницата налутено го праша: „Каде живеете господине Груевски? За една недела се случија четири убиства, кражби на возила, три грабежи на менувачници, нападнато е возило на „Македонија пат“... И за вас е тоа нормална работа?“

А потоа изнервиран од однесувањето на министерот Веле Самак, обраќајќи му се директно, рече: „Срам да вие, што се смеете! ’Бруко една’!“

И на вчерашната седница не изостанаа договорените прашања што пратениците од ВМРО-ДПМНЕ им ги упатуваа на премиерот и на министрите. Пратеникот Живко Пејковски дури ги охрабри со зборовите: „Продолжете и натаму така да работите, верувајте дека се' што ќе сработите, ќе биде за доброто на сите“!