ВМРО-ДПМНЕ подготвува кадровски чистки

За почеток, вмровците кои извршуваа повеќе функции ќе мора да отстапат по една фотелја

Александра М.Митевска


Раководството на ВМРО-ДПМНЕ подготвува смена на дел функционери од партијата, главно, директори на државни институции и на јавни претпријатија, како увертира во можна владина реконструкција наесен.

Според партиски извори, кадровската чистка би опфатила неколку категории функционери - оние што покажале слаби резултати, оние за чие работење имало негативни реакции во јавноста или посочувања од надзорните институции и оние што дошле во судир со партиското раководство.

На тој начин, наводно, би се амортизирало се' поголемото незадоволството во базата - поради неисполнети амбиции на поединци и поради одредени персонални решенија и би се обезбедила поголема кохезија во партијата. Истовремено, власта би манифестирала ажурност и самокритичност во период кога државата ќе се соочи со нови предизвици што би можеле да бидат вовед во предвремени парламентарни избори.

На оваа тема, како што дознаваме, се дискутирало на седница на Извршниот комитет на ВМРО-ДПМНЕ кон крајот на минатата недела, по што завчера заседавал и Централниот комитет на партијата, кој ја донесе првата одлука во насока на кадровското проветрување: вмровците кои досега извршуваа две или повеќе функции и добиваа и функционерски плати и надоместоци ќе мора да ги ослободат вишокот фотелји.

ЦК на ВМРО-ДПМНЕ одлучил сите партиски кадри кои се на повеќе од една функција до крајот на август да останат само на една позиција, за да избегнат судир на интереси, што како проблематика е регулиран со корпусот антикорупциски закони. На засегнатите функционери ќе им биде оставена можност сами да одлучат од кои позиции ќе заминат.

Владејачката партија донесе ваква одлука откако Антикорупциската комисија сигнализираше дека голем број функционери истовремено имаат раководни места во јавни институции и се советници или претседатели на општински совети. Според Комисијата, тоа е класичен пример на судир на интереси, бидејќи антикорупциските закони не дозволуваат избран или именуван функционер паралелно да биде и одговорно лице, како директор или член на управен или на надзорен одбор во јавно претпријатие.

Владата извесно време ги игнорираше предупредувањата од Антикорупциска, а дел од спомнатите функционери тврдеа дека не го прекршуваат законот. Од ВМРО-ДПМНЕ и сега велат дека со извршувањето две функции истовремено не е прекршен Законот за локална самоуправа и дека тој закон, всушност, бил во колизија со антикорупциската регулатива што се донесе подоцна. Сепак, раководството на ВМРО-ДПМНЕ, конечно, реши да ја послуша Антикорупциска комисија, но и да реагира адекватно на реакциите на јавноста, која со неодобрување ги прифати информациите за дуализмот во практикувањето на власта.

„Овој чекор е придонес на ВМРО-ДПМНЕ во јакнењето на демократските процеси во Македонија. Апелираме до другите партии да го сторат тоа“, изјави вчера Зоран Петрески, член на ИК на партијата.

Во ВМРО-ДПМНЕ немаат прецизна бројка колку нивни членови истовремено извршуваат по неколку функции. Сепак, првичните и неофицијални процени се дека операцијата за повлекување на „двојните функционери“ ќе претставува своевидна персонална реформа во институциите на локално ниво и во пониските ешалони на власта, бидејќи најчестите случаи на конфликт на интереси се кај општинските советници кои истовремено се и директори на јавни институции - училишта, претпријатија, установи. Такви случаи има и кај другите партии, но најкарактеристична е ситуацијата со ВМРО-ДПМНЕ, бидејќи оваа партија е на власт и во повеќето општини во државата.

Како примери за конфликт на интереси беа спомнати Владимир Здравев - директор на МЕПСО и претседавач на Советот на општина Центар, Владимир Бахчовановски - советник во Центар и директор на ЈП за стопанисување со станбен и деловен простор, Виктор Камиловски - директор на Градска болница во Скопје и претседател на Советот на општина Аеродром...