Поглед

Вести на рати

Нина Нинеска-Фиданоска

„Тема од областа на економијата“. Вакви најави во изминативе неколку дена стасуваа до македонските медиуми директно од Владата. Никој не кажуваше за каква тема станува збор. И кога новинарите ќе се појавеа во владината сала, таму ги пречекуваше премиерот Никола Груевски опкружен со целата своја министерска свита, за преку нив да и' соопштел на целата македонска јавност какви мерки усвоил неговиот тим.

Па така, во само пет дена, јавноста и медиумите беа „почестени“ со дури три прес-конференции, со добро познатата „фемили“ владина сценографија. Последните два преса беа буквално ден за ден, но уште позачудувачки е што беа одржани во време кога на премиерот „му гори под нозете“ поради страшната бродска несреќа, со драматични последици и со сериозни обвинувања од неговиот бугарски колега и кога јавноста очекува оставки од клучните министри.

И во такви, во најблага мера кажано, несреќни околности, Владата не' информира дека дворовите поевтинуваат на едно евро за квадратен метар, или дека планира да им ги плаќа сметките за струја на сиромашните, но дури по десет месеци! За волја на вистината, конференцијата за падот на ДДВ за становите беше пред несреќата, но останува впечатокот дека и таа беше свикана набрзина, и само еден час пред нејзиното одржување.

Што го предизвика премиерот секојдневно да не' бомбардира со маркетиншки пресови, иако не признава дека е така? Значи ли дека чувствува оти полека се топи неговиот рејтинг и тоа токму на економијата, која му беше главна карта на која играше? Сите овие три одлуки сигурно биле донесени во ист ден и можеа да се соопштат одеднаш, а не на рати, но токму тоа веројатно и е целта, секој ден пред јавноста да се презентираат нови „успеси“. Можеби затоа и медиумите веќе не го сфаќаат сериозно.