Наезда од змии во рудникот „Суводол“

Змии излегуваат од коповите и ползат по рударската опрема, тврдат вработените

БИТОЛА - Змии отровници ги опколија рудниците во РЕК „Битола“. Последните три дена, поради наглото покачување на температурите, во коповите на рудниците „Суводол“ и „Брод - Гнеотино“ змиите станале дел од декорот на едноличната јаловина. Вработени во рудниците тврдат дека змиите почнале да излегуваат од секаде, да се сончаат на свежо ископаната земја, па дури да лазат и по рударската опрема. Иако велат дека змиите отсекогаш ги имало во коповите, топлината што дополнително ја предизвикува согорувањето на јагленот оваа година предизвика вистинска наезда од овие влекачи.

Вработените со големата опасност се соочиле особено при градбата на новиот Подински систем, а велат каде и да копнеш, излегува змија.

„Се појавија змијарници како никогаш досега. Змиите се движат и излегуваат од јаловината само што ќе се појави сонцето. Ги има и големи над еден метар, ама претежно се мали што значи има гнезда под земјата. Некои се бели со црна шара, а други темнозелени. Како што копачот копа во земјата, така и змиите висат на запците. Колега раскажуваше дека наишол на гнездо на смокови“, вели Коле Т. од РЕК „Битола“, ангажиран преку фирма-изведувач.

Вработените стравуваат за својата безбедност особено што секој од коповите е прилично оддалечен од најблиската лекарска служба лоцирана во комбинатот. „Во амбулантата имаме една доза на серум. Но, се надеваме дека ќе немаме шанса да го употребиме противотровот“, изјави Павле Наумов, лекар во амбулантата во РЕК „Битола“.

Според него, работниците се превентивно заштитени од напад на змија со облеката и обувките, кои задолжително ги носат. Но, смета дека вработените не треба да ги предизвикуваат опасните влекачи.

Минатата година, змија касна вработен во ХС „Стрежево“ во Битола ангажиран на браната кај вештачкото езеро. Неговата здравствена состојба многу се искомплицира, а едвај се стабилизира дури по лекувањето во скопските клиники. (А.Б.)