Нашите бе��зински ги затворија грчките

Побарувачката за гориво во Серес, Лерин и во Кукуш е падната за 80 отсто, бидејќи на Грците им е поевтино да наполнат резервоар кај нас и во Бугарија

Од нашиот дописник Миркица Поповиќ

Атина - Високите цени на горивото во Грција се погубни за сопствениците на бензински пумпи во грчките градови на границата со Македонија и со Бугарија. Сопствениците на бензинските се очајни и бараат од државата на некаков начин да им помогне, бидејќи со месеци губат голем дел од профитот поради тоа што на граѓаните им е поекономично да преминат граница, да наполнат резервоар и неколку канистри со бензин и да се вратат дома.

Неодамна Асоцијацијата на сопственици на бензински во Грција го поведе прашањето за опстанокот и условите во кои се наоѓаат бензинските во пограничните региони. Грчкиот бизнис-портал „Капитал.гр“ известува дека споредувањето на ситуацијата на бензинските во градовите на границата со Македонија и со Бугарија со преживување не е само едно хиперболизирање од страна на синдикатите, туку одраз на реалната слика.

Претседателот на здружението на бензински во Лерин, Димитрис Станиадис за „Капитал.гр“ истакнува дека за 70 отсто е падната потрошувачката на бензин во целата префектура на Лерин. Според Станиадис, најголем проблем за бензинските во тој регион е фактот што првата македонска бензинска станица со поевтино гориво е на само 32 километра од Лерин. Иако се' уште не е затворена ниедна бензинска во Лерин, Станиадис смета дека некои од нив нема да издржат подолго од декември.

„Јас лично размислувам да ја затворам бензинската за два месеца. Државата не прави ништо да ни помогне“, вели тој. Проблемите, секако, се појавиле пред неколку месеци по зголемувањето на ДДВ, со што цената на бензинот во Грција, која пред неколку години беше пониска од онаа во Македонија, сега е поскапа за 40-45 евроценти од цената на горивото кај нас.

„На границата не се прават проверки, никој не прашува дали пренесувате бензин, никој не проверува дали има канистри со бензин, граѓаните постојано преминуваат слободно и се враќаат со насмевка, бидејќи заштедиле на бензин“, додава Станидис.

Во Кукуш ситуацијата е за степен полоша. Според изјавите на претседателот на локалното здружение, Јанис Маглусидис за порталот „Капитал.гр“, од 100 бензински, во регионот на Кукуш се затворени веќе 22. И тамошното население ја поминува македонската граница и полни бензин на некои од пограничните бензински станици.

„Државата спие. За секој купен литар бензин надвор од Грција, се губи едно евро во даноци, а само за викенди со полнење бензин на бензинските на премините Евзони и Дојрани државата губи околу 100 илјади литри“, вели Маглусидис. Според него, вкупно од граѓаните на северна Грција, кои полнат бензин на македонските пумпи, државата и грчките бензински се во загуба за 500-600 илјади литри гориво.

Маглусидис бара државата некако да им даде мотив на бензинските во овие региони за да може да продолжат да работи и да почне да се врши построга контрола врз возилата.

Во Драма потрошувачката на бензин, исто така, е намалена за 70-80 проценти. Досега се затворени четири бензински, а 20 отсто од сите бензински се на работ на затворање. Доколку не дојде до намалување на данокот, од тамошните бензински се жалат дека нема да им се најде спас. Бензинските од другата страна на границата се отров за нив.

Покрај македонските, за Грција кошмар се и бугарските бензински станици. Профитот на бензинските во Серес е загрозен, бидејќи некогашните клиенти - граѓаните и камионџиите што поминуваат од Бугарија низ регионот на Серес веќе не се заинтересирани да полнат бензин кај нив. Поранешните подобри цени и гориво во Грција за Бугарите сега се минато заедно со околу 250 затворени бензински пумпи во Серес.

„Капитал.гр“ повикувајќи се на податоците од Европската комисија, пишува дека Грција има најскап бензин, со просечна цена едно и пол евро за литар бензин, додека за споредба, во Македонија и во Бугарија цените се поевтини за 40-50 евроценти за литар.