Ламба со ликот на Александар Македонски пронајдена на Цареви Кули

При археолошките истражувања, пронајден е и накит од хеленистичкиот период

СТРУМИЦА - Годинашните истражувања на археолошкиот локалитет Цареви Кули кај Струмица стартуваа со интересни и вредни наоди од некрополата, која се наоѓа на јужниот рид од локалитетот. Најинтересна за струмичките археолози е ламбата со претстава на Александар Македонски, која најверојатно потекнува од доцниот антички период.

„Меѓу прекрасните ламби што се појавија при ископувањето на некрополата е и ламбата или луцерна, како што велат археолозите, со уникатна претстава на Александар Македонски. Се работи за некоја реминисценција на Александровите победи или за некоја претставена алегорија. Засега наодот е уникатен, не сум видел таков на други места и претпоставувам дека е изработен во работилниците во Солун или, пак, во други работилници во соседството. Не верувам дека потекнува од овие краишта, туку е донесен од некој богат член од некое семејство на тогашниот Тивериопол“, изјави Зоран Рујак, раководител на истражувањата.

Освен ламбата со претстава на Александар Македонски, на истиот локалитет е пронајден и златен накит, обетки и прстени. Според Рујак, се работи за хеленистички накит, а златните примероци укажуваат дека Струмица, односно тогашниот Астраион, во вториот век пред нашата ера бил развиен трговски центар, со богата популација и комуницирал со Солун и со другите градови во соседството, како што Вардарски Рид и Исар Марвинци, кои исто така годинава се истражуваат.

Најновите археолошки наоди на локалитетот Цареви Кули се од некрополата што се наоѓа на јужниот рид и која има голем распон на погребувања, почнувајќи од 2 и 3 век пр.н.е., па се' до 13 век од н.е..

Претходно овој локалитет, како и останатите во југоисточна Македонија, беше цел на дивите копачи, а од 2007 година се реализираат интензивни археолошки истражувања. (Е.П.)