Тетовски средношколци протестираа и навредуваа

ТЕТОВО - Стотина средношколци од албанската заедница, пред се', од гимназијата „Кирил Пејчиновиќ“, вчера, под мотото „Стоп за енциклопедијата“ протестираа еден час во центарот на Тетово. Официјално протестот мина без инциденти. Средношколците поминаа по булеварите „Маршал Тито“ и „Благоја Тоска“, застанаа пред Економското училиште од каде што им се придружија дваесетина ученици. Потоа се вратија по истите улици.

Во паролите на протестантите се величеше албанското, а се навредуваа православието и македонскиот народ. Најмногу се слушаа извиците „Илирида“, „Дарданија“, „Чемерија“, „Далмација“ во „етничка Албанија“, а често и „уа“, особено кога се минуваше покрај куќи или згради населени со Македонци. Имаше навреди упатени кон Македонци, а најчесто се извикуваа „вештачка нација“, алудирајќи на македонската, но и „умрете каури“ (како погрден збор за православните Македонци).

Во СВР „Тетово“ протестот бил пријавен во писмена форма, како организатор се најавила НВО „Специјал“ од Скопје, со потпис на извесен Наим Илјази.

Меѓу присутните на протестот малкумина беа матуранти, а повеќе ученици од пониските класови. Еден од тинејџерите рече дека со протестот го искажуваат револтот и желбата Македонската енциклопедија целосно да се повлече. „Ние сме народ во Македонија и не сакаме да бидеме дискредитирани“, беа зборовите на протестантот. (Г.Е.)