Притворен битолски адвокат поради обид да поткупи полициски инспектор
БИТОЛА - Познат битолски адвокат е во притвор откако се обидел да поткупи полициски инспектор со 10.000 евра, наводно, за да го спаси својот клиент од кривично гонење. Но, како на филм, ниту клиентот што требало да го одврзе кесето ниту клиентот не го премолчиле предлогот. Секторот за организиран криминал при МВР, заедно со битолската полиција, поднесе кривична пријава против 60-годишниот битолски адвокат А.Д. под сомнение дека е сторител на кривични дела давање поткуп и противзаконско посредување.
Адвокатот, знаејќи ги овластувањата што ги има со професијата, со цел да се стекне со противправна имотна корист, на клиентот Н.С. од Битола, еден од менаџерите на АД „Транскоп“ – Битола, му побарал парична награда од 2.000 евра за да посредува кај полициски службеник да се запре преткривичната постапка што се водела против него. Според полицискиот извештај, оваа година во неколку наврати се сретнале адвокатот и неговиот клиент, така што Н.С. го ангажирал А.Д. за свој бранител. Користејќи ја ваквата ситуација, адвокатот на 25 февруари годинава се сретнал со инспектор од СВР-Битола кој ја водел постапката против оштетениот и му понудил поткуп од 10.000 евра, со ветување дека 10 отсто од сумата ќе му бидат исплатени до 7 март, доколку го запре прогонот. За обидот на адвокатот полицискиот службеник пријавил кај својот претпоставен. Згора на тоа, подготвил извештај за целата работа, а се консултирал со јавниот обвинител. Истиот ден, адвокатот се сретнал со клиентот и од него побарал 2.000 евра за да ја среди работата што против него се водела за противзаконско отуѓување деловен простор на „Транскоп“ во Белград, Србија. Но, клиентот го пријавил договорот со адвокатот во полиција, по што на 13 март закажал средба со својот законски застапник во еден од рестораните во центарот на Битола, наводно, за да му ги даде парите. Меѓутоа, еврата претходно биле обележани од полицијата: со наредба од истражен судија адвокатот бил претресен и кај него биле пронајдени парите за поткуп. Еврата се одземени заради документирање на случајот, а адвокатот е притворен. (А.Б.) |
