Заштеда за греење

Со поставување топлински распределители и термостатски вентили, заштеда од 62 до 115 евра годишно

Од 62 до 115 евра може да се заштедат годишно за греење ако се постават топлински распределители и термостатски вентили, покажа пилот-проектот „Распределба и наплата на топлинската енергија на ниво на стан“ што го спроведе „Снабдување Исток“ во изминатата грејна сезона 2010/2011.

Според пилот-проектот, инвестицијата би била околу 50 евра за грејно тело, или 250 евра за стан со пет грејни тела, а враќањето на вкупното вложување за период од 2,5 до 4 години. Притоа, заштедата зависи исклучиво од однесувањето на потрошувачите, односно од тоа колку штедат.

Проектот на„ Снабдување Исток“ опфати објект со вкупно 8 стана и еден деловен потрошувач. Во нив прв пат беа поставени топлински распределители и термостатски вентили или вкупно 81 грејно тело. Опремата беше инсталирана пред почетокот на грејната сезона, а се направија две отчитувања, на крајот на ноември и на крајот на декември.

Распределителите не мерат потрошена енергија, туку ја регистрираат емисијата на топлина од радијаторот. Индивидуалната потрошувачка на секое домаќинство се пресметува како удел од вкупната потрошувачка на целиот објект.

Од 8 потрошувачи, топлинска енергија заштедиле 5 во однос на моделот за распределба и наплатата по квадратен метар. Најголемата заштеда регистрирана кај еден потрошувач е 24 отсто, или 10,851 денар.

На крајот од грејната сезона 2010/2011 „Снабдување Исток“ на сите пет потрошувачи што заштедиле, за да ги стимулира, им достави коригирана фактура, согласно остварената заштеда, додека на останатите три им достави фактури согласно со постојниот модел за распределба и наплата на топлинска енергија, и покрај тоа што имаа потрошено повеќе топлинска енергија.

Во наредниот период, за грејната сезона 2011/2012, „Снабдување Исток“ планира да опреми уште два објекта за мерење и за наплата на топлинската енергија на ниво на стан, но општ е впечатокот дека интересот е многу мал.

Во изминатиот период распределбата на топлинска енергија се вршеше согласно грејната површина и потрошувачите не беа мотивирани да штедат. Ако се земат актуелните цени на топлинската енергија, просечниот годишен трошок за греење на стан со 55 метри квадратни грејна површина е 480 евра.

Пилот проектот што го спроведе „Снабдување Исток“ беше финансиран од фирмите „Техем“, производител на топлински распределители, и „Данфос, производител на термостатски вентили. (МИА)