Сите ги чекаат најтазе милионерите

Македонската јавност ќе ги дознае само најголемите суми екстра приходи кои легнале на нечии банкарски конта

Александрија Стевковска


За десетина дена ќе се дознае колку старо-нови милионери има земјава, бидејќи тогаш се очекува Управата за јавни приходи да обелодени колку граѓани и од каде оствариле највисоки дополнителни приходи во 2009 година. Оттаму информираат дека се подготвуваат решенија што ќе бидат испратени до даночните обврзници, со прецизираните заработени суми и дали тие си ја исполниле својата обврска кон државата преку плаќање данок на тие пари, или имаат нешто да доплатат.

Потоа македонската јавност ќе може да ѕирне во банкарските конта на луѓето на чија сметка лани легнале најмногу пари по основа на регистрирани екстра приходи, но само во нивните суми, а не и имиња. Во истата пригода ќе биде објавено колку изнесувале ланската највисока плата и пензија исплатени во државава.

И годинава, како по традиција, нема да бидат кажани имињата на македонските милионери и богаташи, кои секој месец сметката си ја зголемуваат со високи приходи, бидејќи тоа не го дозволува обврската за заштита на личните податоци.

Во очекување на новите податоци за приходите од минатата година, на луѓето се' уште им е свежо сеќавањето на милионерот од наше маало, за кој лани беше објавено дека во 2008 година, надвор од редовните примања, заработил фантастични 15 милиони евра.

Годинава, за ланските приходи, до УЈП беа доставени околу 150.000 годишни даночни пријави, што претставува зголемување во однос на 100.000 пријави поднесени во 2009 година, меѓу кои беше и пријавата на македонскиот милионер.

Мистериозниот милионер лани пријавил 911,6 милиони денари остварен вкупен приход во 2008 година или точно 14,8 милиони евра, што е добивка три пати повисока од остварената во 2007 година, кога скопјанец од областа на осигурителниот бизнис имаше пријавено вкупен бруто-приход од пет милиони евра.

Во недостиг од официјални информации за лицето кое најмногу се опарило во 2008 година, неофицијално се ширеше информација дека станувало збор за бизнисмен, кој не и' познат на јавноста, но е многу добар во бизнисот што го водел, што се докажа и со остварената заработувачка. Богаташот најголем дел од финансискиот колач го добил преку продажба на акциите од сопствената фирма. Сето тоа се случувало во година која беше кризна и во која берзанското тргување го допре самото дно, за разлика од годината пред неа, кога Берзата го доживеа својот процут и кога од неа се офајдија многумина. Втор по остварен вкупен приход во земјава во 2008 година бил битолчанец, со сума од над 2,6 милиони евра, а тр��т по приходи бил скопјанец со приход од 2,3 милиони евра.

Што се однесува до висината на плати и дополнителни примања од работниот однос, минатата година лидер на листата најплатени бил странец, кој работи во областа на телекомуникациите, со годишен приход од 243,6 илјади евра, што би значело дека тој месечно добивал плата од 20 илјади евра. Втор на листата со највисока исплатена плата, исто така, е странец кој земал по 19,5 илјади евра месечно. Евиденцијата на УЈП покажа дека трет приход по висина бил оној на лицето кое секој месец си инкасирало по 17 илјади евра месечно.

И дел од пензионерите во 2008 година не биле за жалење, барем гледајќи ги бројките со највисок годишен приход од пензија. Тие бројки покажуваат дека најголемите пензии биле исплатувани кај битолчани, кои ги држеле првите три места на листата за највисоки годишни бруто-приходи од пензија. Највисоката пензија тежела 8.200 евра, што значи дека месечно во паричникот на тој пензионер влегувале 684 евра. Друг битолчанец по оваа основа лани месечно добивал по 678 евра. Многу покус не останал и третиот битолчанец на листата за највисоки приходи од пензија, со пензија од 672 евра месечно. Оние што не ги пријавиле навреме даночните решенија за дополнителните приходи, или не платиле данок, ќе бидат казнети од 500 до 1.000 евра.