ЕДИТОРИЈАЛ

Триумфалниот поход на власта

Билјана Ангеловска

Oна што и на лаиците одамна им беше јасно, сега го кажа Уставниот суд. Измените на ДУП „Мал ринг“, кои ги потврдуваат поголемиот дел од објектите од „Скопје 2014“, се донесени незаконски. Се вели, судските одлуки не се коментираат, туку се спроведуваат. Но, кај нас, за жал, само се коментираат, а ниту се почитуваат ниту се спроведуваат.

Последната одлука на уставните судии, се чини, како да не ги допре оние на кои се однесува, нарачателите и изготвувачите на планот. Власта најави дека ќе го продолжи триумфалниот поход на плоштадот „Македонија“. Премиерот Никола Груевски рече дека нема намера да го запре проектот „Скопје 2014“, оти за објектите веќе имало обезбедено одобренија за градење.

Леснотијата со која тој ја изигнорира судската одлука е повеќе од загрижувачка. Како да сакаше да каже дека законите се за плебсот, додека боговите се над се', па и над законите. А, признавањето на грешките е за обичните луѓе, другите се безгрешни.

Ароганцијата со која премиерот се стави над институциите на системот, не е нешто на што не сме навикнале. Тој уште еднаш го покажа својот однос кон државата и кон сопствениот народ. Газејќи по Уставот, со својата надменост само потврди дека Македонија не е правна држава. А, ако власта сама не го почитува судот, тогаш тоа не треба да го очекува ниту од граѓаните.

Случајот можеби ќе имаше поинакви димензии доколку се работеше за одлука со која се поништува пропис донесен од друга владејачка гарнитура. Како тогаш би реагирале надлежните општински и државни органи, дали ќе го игнорираа мислењето на судиите или уште истиот ден ќе ги донесеа багерите да уриваат на плоштадот?

Тоа и не е толку тешко да се замисли, оти еднаш веќе имаше таков случај, кога тогашниот главен градежен инспектор Љупчо Балковски направи попара од прекрасните куќи во Злокуќани. Целата јавност тогаш гледаше со чудење, но и со страв дека ако се прави нешто спротивно на законот, последиците кога-тогаш ќе мора да се понесат.

Се разбира, не значи дека и сега треба да се постапи исто. Никој не ни помислува на Скопје да му се случи второ Злокуќани. Таман работа некој да крене рака на објектот на Уставниот суд. Не зашто тој не е спорен, туку зашто е многу пологично наместо да се урива, да се смени ДУП-от. Впрочем, и самата судска одлука нуди избор: или уривање на објектите или нивно ставање во законска рамка. А, кога од двете зла ќе се одбере помалото, логично е да се пристапи кон донесување нов ДУП за „Малиот ринг“.

Но, власта, очигледно, има други планови. Таа не сака да губи време и најави дека нема да ја запре реализацијата на проектот. Да се рече дека нема ништо да се случи со „Скопје 2014“ зашто за објектите веќе имало издадени одобренија, е навреда не само за урбанистичката фела, туку и за целата јавност.

Ќе си го обели ли образот Општината Центар пред своите граѓани така што ќе ја почитува судската одлука? Општината сама го донесе прописот, кој потоа сама и го прекрши. Доколку Центар навистина има намера да ја почитува уставната одлука, што е нејзина законска обврска, тогаш ќе мора да ги запре сите дејства на плоштадот се' додека не го скрои новиот ДУП. А, тоа би значело барем шест месеци пауза во изградбата.

Но, исто така, прашање е што сега ќе преземе опозицијата? Во една пригода беше речено дека за новиот изглед на Скопје треба да одлучи народот на референдум! Ќе бара ли опозицијата сега референдумско изјаснување? Или и овој пат ќе остави со власта да се справуваат невладините орган��зации, па и по цена да изедат ќотек! Празното ламентирање од канцеларија нема да ја допре власта, а уште помалку ќе ја исплаши и ќе ја принуди да преземе чекор во правец спротивен од оној по кој веќе се движи.