Претходен број

Кој има храброст да го соопшти новото име

Дебатата „Дијалози за Македонија“ исфрли на површина можни лоши сценарија за иднината на земјата

Соња Крамарска

Членството во ЕУ и во НАТО, кое се' уште е недостижно за Македонија, полека станува клучна тема на аналитичарите, интелектуалците и оние политички кругови кои изразуваат несогласување со бавниот процес на решавањето на спорот со Грција, кој е услов за стапување на нашата земја во овие два клуба.

Во дискусијата насловена како „Дијалози за Македонија“, која вчера ја организираше претседателот Бранко Црвенковски, а беше посветена токму на евроатлантските интеграции, беше упатена жестока критика кон кочничарите на европската перспектива на Македонија.

Најпрвин шефот на државава, Бранко Црвенковски, рече дека никој нема право да ги менува приоритетите на земјата, јасно алудирајќи на премиерот Никола Груевски, а потоа и отворено побара спорот со јужниот сосед да биде решен до започнувањето на долгиот изборен циклус што почнува со претседателската трка во САД, локалните и претседателските избори во Македонија идната пролет и евроизборите во јуни во Грција.

„Подобро е спорот да биде решен отколку да биде замрзнат“, смета Црвенковски, додавајќи дека Владата, како што рече, си создава алиби за неуспехот што ја чека земјава на патот кон Брисел. „Во ЕУ не се решава со консензус за датумот за преговори и нема место вината да биде префрлена врз Грција“, порача Црвенковски, кој смета дека последниот предлог на Нимиц е во корист на Македонија.

Ѓунер Исмаил, аналитичар, прашува дали има некој храбар, како што вели, што ќе го соопшти идното име на Република Македонија што ќе биде влезница за евроатлантскиот клуб.

Тито Петковски, лидер на Нова социјалдемократска партија, кој бара за стратегијата во грчко-македонскиот спор да расправа парламентот во Скопје, рече дека е важно достоинството на една земја, но предупреди и дека се важни и територијалниот интегритет и изградбата на богато општество. „Ако се определиме за изолација, мора да им кажеме на граѓаните што ги чека“, рече Петковски.

Единствено Билјана Ванковска, професорка по меѓународно право и по меѓународни односи, рече дека не се согласува оти Македонија ќе пропадне без ЕУ и без НАТО. „Оваа држава има шанси да опстане“, вели таа. „Само треба веднаш да смислиме план Б, бидејќи е јасно дека есенските оцени на Брисел за ��акедонија нема да бидат поволни“, вели Ванковска. Таа смета дека ЕУ и НАТО и самите се наоѓаат во криза и не се најдобра перспектива за Македонија.

Опозициската лидерка Радмила Шекеринска ја обвини Владата дека игра, како што рече, на две топки. „Тие се свесни дека оној што ќе каже дека Македонија ќе го напушти концептот за членство во ЕУ и во НАТО ќе доживее дебакл во јавноста“, вели Шекеринска. Оттука Владата, додава таа, зборува за ЕУ и за НАТО, но реално не прави ништо да го забрза процесот на зачленувањето. Лидерката на СДСМ вели дека македонската Влада ќе ги префрли сите свои грешки на контото на Грција, иако во Европската комисија не постои ветото како инструмент.

Интересно е што и ДУИ, партнер на Груевски во Владата, смета дека земјава нема алтернатива за ЕУ и за НАТО. Тоа во вчерашната дискусија го соопшти пратеникот од оваа партија Тахир Хани, а економскиот аналитичар Абдулменаф Беџети дури оди и подалеку со констатацијата дека во Владата едниот партнер бега од ЕУ и од НАТО (ВМРО-ДПМНЕ), а другиот партнер (ДУИ) цврсто се залага за приклучување.

Сепак, сите се согласни дека евроатлантската определба на Македонија барем засега има една позитивна страна, а тоа е, како што изјави на крајот претседателот Бранко Црвенковски, што ја одржува кохезијата меѓу различните етнички и социјални заедници во Македонија. Но, до кога тоа ќе биде така?

Лидерката на СДСМ на заминување, Шекеринска, ќе рече дека не се брани достоинство на земјата со земање бугарски, а подоцна веројатно и албански пасоши, алудирајќи на владиниот став дека попуштањето во спорот со Грција ќе биде удар врз националното достоинство на Македонија.