Британците летово на одмор во Турција и во Хрватска
Главна причина за одбегнување на традиционалните дестинации е скапото евро во однос на британската фунта
Лондон - Британските туристи ова лето ги одбегнуваат своите традиционални дестинации за летување и одмор, Шпанија, Грција и Франција, префрлајќи се кон земјите на Југоисточна Европа и Северна Африка, соопшти Асоцијацијата на британските туристички агенции. Според побарувачката на аранжманите, поголемиот дел од Британците ова лето ќе патуваат кон Турција, Хрватска и Бугарија, како и кон Тунис и Египет, а како главна причина за ваквата промена е скапото евро во однос на британската фунта.
За само една година, од крајот на минатото лето, вредноста на фунтата е намалена за 20 отсто, поради што и онака скапата туристичка понуда на шпанскиот и на грчкиот брег годинава ја направија уште поскапа.
Агенциите кои продаваат аранжмани за летување во странство јавуваат дека побарувачката за Турција е поголема за 14 отсто, за Тунис за 50, а за Хрватска и нејзиниот јадрански брег дури за 150 отсто. Јадранот и Хрватското Приморје ова лето се нудат како „се' уште неоткриено подрачје на Европа“, поевтино од Грција и Шпанија, а исто така безбедносно релаксирано и погодно за семеен одмор.
Во исто време, бројот на аранжманите за грчките туристички центри е намален за девет отсто, колку и барањата за аранжман во Шпанија. Објаснувањето се бара во цените на пакетот со основни производи, што најчесто го користат туристите, а тоа се цените на пивото, безалкохолните пијалаци, кафето и разните кремови за сончање, кои во Грција се за 22 проценти поскапи од оние во Турција. Слични такви споредби се прават и со Франција и со Италија, каде што шише пиво, на пример, е двапати поскапо од она во турските летувалишта.
Авионските компании соопштија дека резервациите за аеродромот во Барселона, кој е врзан за шпанската Коста Брава, ова лет�� се помали за 16 отсто, додека во исто време резервациите кон аеродромот во Даламан, кој ги опслужува Мармарис, Фетие, Олу Дениз и другите места на тој дел од егејскиот и медитерански брег се поголеми за 10 отсто.
Секоја година во Шпанија престојуваат по околу 12 милиони Британци, додека на летување и одмор во Грција заминуваат 2,2 милиона, а во Турција 1,2 милиони туристи од Велика Британија. (МИА) |
