Претходен број

Црвенковски и Велјановски во војна со писма

Претседателот на државата ќе го потпише само Законот за јазиците

Светлана Унковска

Шефот на државата, Бранко Црвенковски, и собранискиот спикер Трајко Велјановски, иако и двајцата се на годишен одмор, преку своите кабинети вчера повторно разменија пораки и обвинувања за тоа кој ги почитува, а кој ги крши процедурите.

По најавата дека претседателот на државата ќе се произнесе за законите откако ќе се врати од одмор, вчера, иако се' уште не беше вратен, од неговиот кабинет соопштија дека тој нема да ги потпише петте спорни закони и бара од Велјановски да ги стави на повторно изјаснување пред пратениците. Таквото барање претседателскиот кабинет го образложи со фактот што законите биле ставени на повторно разгледување без претседателот официјално да се изјасни дека ставил вето.

Во меѓусебната преписка кабинетите на Црвенковски и на Велјановски разменија обвинувања за блокирање на институциите и за тоа кој е повеќе одговорен во продлабочување на политичката криза.

Црвенковски, кој утре се враќа од одмор, како што веќе и официјално е соопштено, ќе го стави својот потпис само на Законот за употреба на јазиците кој по втор пат беше ставен на изјаснување минатиот понеделник откако до парламентот стаса неговиот допис дека одлучил да не го потпише пакетот закони, меѓу кои беше и овој закон.

Но, Црвенковски нема да ги потпише и преостанатите закони кои Владата набрзина ги стави на повторно гласање во парламентот само врз основа на политичката порака која Црвенковски претходно ја прати до опозицијата дека нема да ги потпише законите како услов СДСМ и ДПА да го прекинат бојкотот на парламентот.

„Законите за работни односи, за лобирање, за адвокатура, експропријација и енергетика повторно беа изгласани спротивно на пропишаната процедура, односно без претходно добиено писмено известување од страна на претседателот на државата. Поради тоа, претседателот нема да ги потпише указите за стапување во сила на овие закони“, соопшти вчера претседателскиот кабинет.

Црвенковски, како што се додава во со��пштението, му предлага на собранискиот спикер Трајко Велјановски преостанатите пет закони да ги стави на повторно гласање во парламентот.

„Законите дополнително ќе добијат поголем легитимитет ако се изгласани во присуство и на опозицијата и на тој начин би се нормализирале парламентарниот живот и функционирањето на политичкиот дијалог, како еден од критериумите неопходни во процесот на нашето интегрирање во ЕУ и во НАТО“, порача Црвенковски.

На тоа уследи експресна реакција од шефот на парламентот, Велјановски, чиј кабинет вчера ги отфрли обвинувањата за кршење на процедурите и побара од претседателот Црвенковски во рок од седум дена да ги потпише законите.

„Претседателот на државата, Бранко Црвенковски, уште еднаш ги надминува своите уставни надлежности и грубо се меша во надлежностите на законодавната власт – Собранието, и на судската власт - Уставниот суд“, реагираше Кабинетот на Велјановски.

Во реакцијата на Велјановски се тврди дека спорните закони се изгласани по втор пат на 1 август откако поминал рокот од седум дена од нивното прво донесување, а во овој рок претседателот на државата не се изјаснил дали ќе ги потпише.

Објаснувањето на Велјановски е дека, според член 52 од Уставот, новодонесените закони во рок од седум дена треба да се објават во „Службен весник“, што значи дека претседателот на парламентот по истекот на тој рок може да ги стави законите на повторно изјаснување.

Војната со писма меѓу двата кабинети, на претседателот Бранко Црвенковски и на шефот на парламентот, Трајко Велјановски, и вчера не даде одговор за тоа кој е во право. Оваа седмица можеби ќе се разјаснат работите, но дали ситуацијата ќе се развива во правец на продлабочување на очигледната криза, за што се обвинуваат меѓусебно Црвенковски и Велјановски, или пак ќе стивнат страстите, допрва ќе се знае.