Старите лични карти мора да се заменат до февруари

Околу еден милион граѓани во наредните четири месеци треба да ги заменат старите документи со нови

Даниела Трпчевска


Сите стари лични карти со темносина боја граѓаните ќе треба да ги заменат со нови до февруари идната година. Според некои процени, станува збор за уште околу еден милион лични документи, кои треба да се заменат со биометриски. Заклучно со 15 септември, во изминативе три години се издадени 405.153 лични карти, кои ги содржат новите заштитни кодови. Одлуката за замена на старите лични карти важи за сите граѓани, без оглед на тоа дали се' уште не им е изминат рокот на важност на исправата, или, пак, поседуваат трајна лична карта.

Во согласност со Законот за изменување и дополнување на Законот за лична карта, новите документи што почнаа да се издаваат во 2007 година, мора да се заменат во рок од три години. Рокот изминува на 27 февруари 2010 година, од кога почнуваат да важат само светлосините лични карти, кои се слични на кредитните картички.

Терминот за вадење нови документи може да се закаже само телефонски, доколку се јавите на бесплатниот број 0800 192 92.

Кол–центарот работи секој работен ден од 8 до 20 часот, а во саботите од 8 до 16 часот. Поради големиот број повици треба да се почека неколку минути пред да се јави операторот. Доколку денеска се јавите да закажете термин за вадење нова лична карта, слободни термини што ќе ви бидат понудени се 5 или 6 октомври. Скопјани можат да аплицираат за нови документи во подрачната единица на МВР, која се наоѓа кај старо Беко, или, пак, во зградата на МТВ. Од Кол-центарот добивате прецизни информации во колку часот, на кој шалтер и во која кабина треба да се фотографирате за новите документи. Операторите можат да ве информираат и за сите документи што се потребни за вадење нова лична карта, во случај таа да е изгубена или доколку сте го смениле местото на живеење.

За да се извади нова лична карта потребно е да се пополни барање и да се уплатат 190 денари, во која било банка или во пошта. Уплатата може да се изврши и претходно, со што ќе се олесни целата процедура. Фотографирањето се врши во просториите на МВР, каде што апликантот ги остава своите отпечатоци и своерачен потпис за поголема заштита на новите биометриски документи. Во подрачните единици на МВР се истакнати огласни табли за неопходните документи, кои граѓаните треба да ги поднесат при аплицирањето за нови документи. Апликантите се известуваат со СМС- порака кога можат да ги добијат готовите документи. Од МВР уверуваат дека постапката не трае повеќе од десетина дена.

Со цел да се избегнат големите мешаници пред завршувањето на рокот, од МВР најавуваат дека ќе преземат низа активности за навремено информирање на граѓаните до кога треба да ги заменат личните документи со биометриски. „За таа цел ќе се отпечатат плакати и летоци, кои ќе бидат поставени на повеќе локации во градот и во земјава“, ве��и Иво Котевски, помошник-министер за информирање во МВР.

Бидејќи станува збор за голема бројка на граѓани што треба да ги заменат старите документи, можно е да има преоден период во кој ќе се толерираат задоцнетите апликации, велат надлежните. Во Законот за изменување и дополнување на Законот за лична карта, објавен во „Службен весник“ број 19/2007 на 19.2.2007 година, се предвидени и парични казни за оние што нема да поседуваат валидни лични карти, но засега од полицијата не можат да прецизираат дали и од кога тие би можеле да се применуваат.

Граѓаните се жалат дека понекогаш е многу тешко да се добие слободна линија за да се закаже термин за вадење нови документи. Од МВР, пак, објаснуваат дека фирмата што е задолжена за Кол-центарот засега има обезбедено 11 слободни линии, но доколку се јави проблем тие се должни да ги зголемат капацитетите за да им излезат во пресрет на граѓаните. „МВР има капацитет дневно да прими од две до три илјади барања од граѓаните, со што за три месеци би можеле да издадеме и до 300.000 нови документи“, вели Котевски.

За разлика од личните карти, пасошите и возачите дозволи можат да се заменат со нови во наредните две години. Со оглед на најавите за визна либерализација од јануари идната година, граѓаните масовно ги менуваат старите пасоши со биометриски, што, пак, ќе им овозможи патување без виза во земјите на ЕУ.