„Маршот на ВМРО“ ги испрати во ноќта изборните победници

Атмосферата се вжешти околу 22,30 часот кога со труби, зурли и тапани се пееја патриотски песни

Горан Адамовски

„ВМРО ти си наша иднина, ВМРО ти си наша судбина“ ечеше во ноќта меѓу неделата и понеделникот од центарот на Скопје каде што се славеше убедливиот изборен триумф на „портокаловата“ коалиција. Популарниот „Марш на ВМРО“ во Домот на АРМ каде што беше штабот на владејачката партија, почна да се слуша уште од 21 часот кога веќе се насетуваа изборните резултати. Река од членови, активисти и симпатизери на ВМРО-ДПМНЕ почнаа да се слеваат кон центарот на градот. Портокалови маички, црвени знамиња, најмногу партиски и со сонцето од Вергина и гласни автомобилски свирки беше сликата на скопските улици.

Во седиштето на партијата ноќта беше мирно како никогаш порано.

„Очекувавме висока победа и затоа некако славењето не е како пред две години“, вели еден млад кичевец, дојден само за да биде дел од прославата. Поинаква слика во Домот на АРМ, стотина метри подалеку, каде што партиското обезбедување остави стотици славеници надвор од вратите. Место имаше само за „одбраните“.

Атмосферата се вжешти околу 22,30 часот кога со труби, зурли и тапани се пееја патриотски песни. Во Домот на АРМ беше како во вршник. Клима-уредите не успеваа ни малку да ги разладат просториите, преполни со министри, функционери, видни и познати вмровци. Скандирањето „Никола, Никола“ околу 23 часот значеше дека во штабот пристигна и лидерот на партијата. Еуфорија, торта и шампањско. Говорот на досегашниот, веројатно и иден премиер, беше прекинуван со аплаузи и скандирања. Груевски ги оцени како фер и демократски изборите во 98 проценти од земјава, а за тие „два процента“ каде што се случуваше насилство изрази жалење, сочувство и најави прегласување.

Оттаму сите на плоштадот „Македонија“, каде што веќе се славеше на големо. Дваесетина минути по полноќ, Груевски се качи на импровизирана говорница. Ги соопшти резултатите, им се заблагодари на сите и најави бескомпромисна борба на сите полиња за подобрување на животот.

„Не' чекаат силни предизвици, како што е зачувувањето на уставното име“, изјави Груевски, најавувајќи дека само со „чесен приод кон државата, нацијата и граѓаните“ може да се стигне до резултатите, кои Македонија ги очекува од изборните победници.

„Да живее Македонија, да живее ВМРО-ДПМНЕ“, заврши Груевски, што значеше крај и на прославата на плоштадот, иако пукотници се слушаа во сите скопски населби.