Требаше да дадам неотповиклива оставка

Гледано од оваа временска дистанца, ми се чини дека требаше да дадам оставка за атентатот врз тогашниот претседател Киро Глигоров, вели професорот по меѓународно право на Правниот факултет во Скопје, д-р Љубомир Д. Фрчкоски, кој, во времето кога се случи овој немил настан пред 15 години, беше на функцијата прв човек на македонската полиција.

„Министерот, објективно, е одговорен кога ќе се случи еден ваков настан. Во нормални околности без размислување би се повлекол од функцијата. Но, тогаш беше извршен притисок врз мене и политичките калкулации беа такви дека е подобро да не се прифати мојата понудена оставка и да останам на функцијата“, вели Фрчкоски.

На прашањето дали во сите овие години е доволно направено за да се откријат извршителите на атентатот, но уште поважно да се пронајдат инспираторите и организаторите, професорот е прилично резервиран во одговорот.

„Место да се води истрага, секоја година, па и оваа, се водат некакви дебати околу атентатот, што е сигурен знак дека не се прави ништо. Се испушти еден решавачки момент, а тоа е падот на српскиот режим, кога требаше да се проверат сите траги што водеа кон структурите на КОС“, потенцира ексминистерот. Вели дека му е жал што пред две години Обвинителството не обрнало доволно внимание на новиот сведок што тој го посочил, поранешен припадник на ДБК, преку чие сведочење е поминато многу бегло.

На нашето прашање дали не е малку цинично да се префрла вината врз други, кога токму тој, како задолжен за полицискиот ресор во тоа време, излезе на прес-конференција со сериозни обвинувања за постоење на т.н. бугарска врска.

„Можеби е погрешено. Но, тогаш се проверуваа сите траги што одеа во повеќе правци. Се проверуваше т.н. братиславска врска, а нашите сознанија во тоа време не беа насочени кон источниот сосед, туку кон една мултинационална компанија, што зборува дека контекстот беше поширок и мултилатерален и еден крак водеше и кон српските разузнавачки служби“, додава Фрчкоски. (Г.Д.)