Запрена изградбата на бензинската на „Лукоил“ во Куманово

Куманово - Изградбата на бензинската пумпа на „Лукоил“ во центарот на Куманово е запрена поради низа неправилности за почнување со градба.

Кумановската полиција поднесе кривична и прекршочна пријава за изведувачот „Арс-инжинеринг“, за оштетување јавни инсталации и за почнување со градба без одобрена шема на градилиште со што, велат, се создава сообраќаен хаос во градот. „Ние работиме на давање согласност. Ќе се обидеме точно да прецизираме стриктни правила по кои можат да се изведуваат одредени градежни работи и само по тие правила ќе може градителот ’Арс‘ да продолжи со работа, а дотогаш градежните работи ќе мируваат. Треба сообраќајно да се регулира пристапот до градилиштето, како и други поединости, за да не се создава метеж во сообраќајот“, изјави Марјан Павличек, командир за безбедност на сообраќај при СВР-Куманово.

Од локалната самоуправа информираат дека сите релевантни институции имаат издадено согласност за добивање одобрение за градба. „Нашиот сектор единствено што во овој момент треба да направи е да ја проследи законската процедура и сите релевантни институции се произнесоа позитивно, така што ние ниту можеме ниту смееме во согласност со Законот да ја стопираме оваа процедура.

Има посебни управни постапки, кои ја преиспитуваат работата на кој било орган, така што ние не сме во можност да го направиме тоа “, рече Лидија Ланг, началник на Секторот за урбанизам при општина Куманово. (МИА)