Претходен број

Прв пат по повеќе од десетина дена, премиерот Никола Груевски се појави во јавноста. Тој вчера присуствуваше на пуштањето во сообраќај на втората делница од обиколница околу Скопје, на потегот од Оризари до Сарај. Последен пат беше виден на свечениот пречек на Љубе Бошкоски од Хаг на 11 јули, а од тој момент видливо беше неговото отсуство од повеќе важни настани.

Во Влада не сакаат да прецизираат дали македонскиот премиер користел годишен одмор или, пак, свесно избегнувал да се појави на некои случувања.

И покрај тоа што самиот го отвори „егејското прашање“ во преписката со грчкиот колега Караманлис, невообичаено беше тоа што Груевски не присуствуваше на големиот собир на децата-бегалци во спортската сала „Борис Трајковски“.

На прашањето каде бил Груевски за ова време, владиниот портпарол Ивица Боцевски неодредено одговара дека „биле во постојана комуникација“. На нашето инсистирање да прецизира дали тоа значи бил сето ова време на работа, владиниот гласноговорник нервозно одговори „јас знам што ви зборува Макрадули“, за веднаш потоа да ја прекине линијата, правдајќи се со презафатеност. (П.Р.)