Ексдиректорот на ЈП за спортски објекти проневерил 16 милиони евра
Сали Бислими (56), кој сега работи како професор, беше уапсен пред учениците и колегите од „Зеф Љуш Марку“
Горан Адамовски
Поранешниот директор на Јавното претпријатие за стопанисување со спортски објекти, Сали Бислими (56), е осомничен за проневера на 16 милиони евра. Бислими, кој сега работи како професор во гимназијата „Зеф Љуш Марку“ во Скопје, вчера беше уапсен пред очите на учениците и на професорите, кои беа револтирани поради ваквата акција. За денеска најавија масовен протест.
Според МВР, Бислими, додека бил директор, ја злоупотребил службената положба и овластување, бидејќи склучил повеќе договори и анекси на договори за закуп на спортски објекти во државна сопственост, без да ја извести Владата и без да добие нејзина согласност. Покрај тоа, Бислими за овие договори немал поддршка од Управниот одбор на претпријатието, а немало ниту објавен оглас за јавно наддавање и гаранции за навремена наплата на закупнините. Со ваквото решение ја оштетил државата за 15,8 милиони евра.
Сали Бислими директоруваше со претпријатието од 19 мај 2005 до 29 август 2006 година. Според пријавата, Бислими не само што склучувал нови договори туку и ги потврдувал штетните договори што неговиот претходник Алир Палоши, кого го чинеа кривичен прогон. Додека бил на функција, Бислими под закуп дал дваесетина објекти, од кои 11 во Скопје, а по пет во Битола и во Тетово.
Апсењето на Бислими се случи вчераутро во училиштето додека се одржувала редовна настава. По третиот час, односно за време на големиот одмор, неколкумина припадници на полициските „алфи“, влегле во зградата на „Зеф Љуш Марку“ и му дале допис на директорот на училиштето. Потоа во дворот од училиштето го уапсиле Бислими.
„Срамота. Апсат професор пред очи на деца, од кои поголемиот дел малолетници. Зарем не можеа да го уапсат дома или на кое било друго место“, реагираа колегите на Бислими. Децата во знак на револт поради апсењето на нивниот професор по менаџмент, поставија два контејнера на улицата „Бледски договор“ во населбата Карпош, каде што се наоѓа училиштето и го блокираа сообраќајот еден час, по што си заминаа. Наставата во училиштето беше прекината, а за денеска се најавени протести.
Министерот за образование, Сулејман Рушити, смета дека учениците не треба да бидат вмешани. „Ако некој го прекршил законот, тој и ќе одговара. Ако некој треба да се апси, не можеме да го штитиме“, изјави Рушити, признавајќи дека за акцијата дознал по апсењето на Бислими.
„Не знам зошто не ме информирале за апсењето“, се чудеше Рушити. |
