Кого претставува Треневски – себеси или Владата

Без оглед на ставовите, нема шанси НАТО да ги одбие агреманите на Треневски

Слободанка Јовановска



„Паднав од смеа. Мислев дека сум јас најанти-НАТО во Македонија“, беше реакцијата на професорката Билјана Ванковска вчера околу презентацијата на новиот амбасадор на Македонија во Алијансата, Мартин Треневски. „Едно е да имаш личен став, или научен, но дипломат е дипломат зашто внимава што зборува. Ме изненади неумешноста со која ги кажуваше нештата и мислам дека досега немало понедипломатски настап на кандидат за амбасадор на Македонија“, оцени таа.

Дипломати со контакти во НАТО оваа слика за Треневски ја сметаат за олеснителна околност за Македонија, иако звучи парадоксално. Сега барем ќе знаат со сигурност со кого си имаат работа, па нема да го прашуваат за мислење и нема да го земаат за сериозно, порачуваат тие.

Веста за намерите на новиот македонски амбасадор во НАТО вчера не беше стигната во Брисел и не можеа да реагираат, но, генерално, порачаа дека без оглед со какви тези доаѓа, ако земјата го именувала, нема да му ги ускратат агреманите.

Тоа, според дипломатски искуства, не е практика на Алијансата која има амбасадори во Брисел и од земји кои немаат намера да станат членки или имаат конфронтирачка реторика, како таа, на пример, на Русија. Дури и од политички кругови блиски до ВМРО-ДПМНЕ, надвор од опкружувањето на премиерот, беа шокирани од настапот на новиот амбасадор, кој заборави дека и Македонија има војници во мисијата во Авганистан, па нејзиниот неуспех е и наш.

Амбасадорот со најдолг стаж во НАТО, Нано Ружин, му порача на Треневски да стане повторувач т.е. да си ги преработи тезите и уште еднаш да ги брани пред Комисијата за надворешна политика, за да не не' срами во Брисел. „Можеби е добар за конзул, но не е подготвен да биде амбасадор во Алијансата“, оцени Ружин посочувајќи дека покрај останатото, лош е и јазикот со кој настапи во парламентот. „Најавата дека ќе работи на тоа да се смени начинот на гласање во НАТО и принципот на солидарност е глупост“, вели Ружин додавајќи дека ниту францускиот лидер, Николас Саркози, ниту лидерот на САД, Барак Обама, можат да го сторат тоа, бидејќи начинот на функционирање на НАТО е загарантиран со неговиот статут. Според него, амбасадорската платформа на Треневски била мно��у неточна и неосмислена, па може само да наиде на критики во Брисел.

„Поразувачки е некој да мисли дека може да наметне свои правила во организација како НАТО“, беше првата реакција на Ризван Сулејмани, поранешен заменик-министер за одбрана на Македонија. Според него, не е работа на дипломат да изигрува пророк т.е. да кажува што ќе се случи, туку да спроведува ставови на Владата. „Опасно е да се впушта во такви ситуации. Тој треба да се фокусира на правците на движење на Алијансата и да се позиционира според нив, место да биде против нив. Ние сме премали за тоа“, оценува Сулејмани.

Речникот со кој настапи Треневски и за него не е нешто нормално во дипломатијата, а не држи ни тоа што премногу ја базира политиката врз дијаспората, која не може да ја креира политиката на државата, дотолку повеќе што тој во Брисел треба да ја претставува Владата. Во МНР неофицијално не биле возбудени многу од реакциите на презентацијата на новиот амбасадор во смисла дека за секое чудо треба три дена, па и ова ќе биде заборавено.