Грујо, не пиеме грчка нафта

Бојан Илиевски

Доста ни е од божемните борци за името и идентитетот, кои само им даваат аргументи на грчките националисти, а нас не' прават заробеници на омраза кон сите Грци. Доколку само малку се навратиме на историјата, не со векови, туку неколку години наназад, ќе забележиме дека истите тие „борци“ се појавуваат како грчки сведоци во судски пресуди против нашата држава, а милионските казни ги плаќаме сите ние, граѓаните на Македонија.

Веќе доста ни е од „борците“што зборуваат за европеизација, демократија и за борба против корупција, а спроведуваат букефализација и корумпираат медиуми, судии, академици и ректори и одлучуваат зад затворени врати. Не ни преостанува ништо друго, освен да им кажеме дека доста ни е од нив, да кажеме големо „не“ против властодршците, кои секојдневно го злоупотребуваат името Македонија за лични, фамилијарни и партиски интереси.

Обвиени од тешката пропаганда што не тероризира, а беше многу тешка да се избегне, бидејќи беше под закрилата на буџетот на Македонија, пропаганда финансирана од народот за народот, но не за интересите, туку за перење на нивните мозоци. Конечно, таа политика го доживеа крахот. Преродбата не може повеќе да се храни паразитски од крвта на народот, сега се соочува со почеток на крајот. Ова е само чекор до последното скалило кога ќе се ослободиме од молкот и мракот што не' обвија во изминативе четири години. Успеваа, ги користеа нашиот страв и малодушност за да ги газат нашите права и слободи, но сега е време да им кажеме дека не им се плашиме, дека не сме восочни фигури, дека сме горди Македонци и со право да побараме да ни ја вратат нашата Македонија, онаа вистинската, победничка Македонија, онаа што сите ние ја заслужуваме.

Меѓутоа, за таа Македонија, европска, треба да се избориме, да не стоиме настрана, да се обединиме во борбата против окупаторите на нашата свест и совест. Само така можеме да бидеме победници, почитувани во Европа, во светот и земја атрактивна за влез на странскиот капитал. Сега или никогаш! Сега е моментот да кажеме „не“ против овој недемократски тоталитарен режим.

Дојде времето кога, конечно, треба да се избориме за нашето достоинство, да покажеме кои сме, да ја искористиме шансата за промоција на нашите вистински квалитети, да ги отвориме хоризонтите на Македонија, да добиеме и ние можност нашите семејства што сега едвај преживуват да бидат горди на себе, да имаат стандард како европските семејства, да ги почувствуваат благодетите на животот, а не да живеат во стандард 60 проценти понизок во однос на нив.

Господине премиере, ние не сме твојот каков-таков народ. Ние знаеме што сакаме, а што не сакаме. И имаме право да се бориме против сите што ја тероризираа нашата совест, сите оние што ја оневозможуваат нашата интеграција во ЕУ и во НАТО само заради бизнис-интересите на вашите лоби и фамилијарни интереси.

Не сакаме изолирана Македонија! Не сакаме држава во која буџетските средства се трошат за партиско рекламирање и за манипулирање со јавноста, а не за решавање на проблемите на граѓаните.

Доста ни е од партиски мегафони што не' трујат со теории на заговори, секојдневно јадат бурек и ни брмчат како бумбари. Доста Ви беше.

Единствено што и' останува на оваа Влада е да си ги собере куферите, да си замине. Оставија многу натрупани проблеми што бараат вистински решенија, а не кукање дека не можат да се решат.