Насловна

Уставeн суд ќе свети во сите бои

Во новата зграда судиите ќе газат на подови вредни 2,5 милиони евра

Деспина Трајковска

Подовите, плафоните и прозорците во новиот објект на Уставен суд ќе чинат речиси 2,5 милиони евра. Со овие пари ќе се набават гранитни плочи со кои генерално ќе се покријат подовите, а администрацијата во објектот ќе гази и на ламинат, итисони, теписони...Прозорците ќе бидат обични, а какви врати ќе се отвораат и ќе се затвораат низ зградата, надлежните допрва ќе одлучат.

Сликовито вака од владината служба објаснуваат за што ќе се потрошат речиси 2,5 милиони евра колку што е зделката договорена со „Гранит“ и се однесува на ентериерно уредување на објектот, чија изградба не запира, и покрај пеколните горештини. Иако ентериер подразбира и мебел, сепак, во случајов тој се уште не е во игра.

„Со овој договор е утврдено ентериерно уредување на подови, плафони и прозорци. За мебелот и за сите внатрешни врати на објектот допрва ќе се распишува тендер оти се' уште е рано за реализирање на таа фаза“, информира Васил Доневски, директор на владината Служба за општи и заеднички работи.

Според Доневски, најголем дел од подовите ќе бидат од гранитни плочи од македонско производство, а на некои места низ објектот ќе се постават ламинат, итисони, теписони...Гранитот наместа ќе биде разбиен со шари, но невпечатливи.

„Се' ќе биде изведено убаво со стил“, додава директорот, според кого, сумата од речиси 2,5 милиони евра за посочените елементи од објектот воопшто не е преголема ако се има предвид неговата големина. Тој тврди дека досега не е надминат предвидениот лимит за реализација на овој проект, кој изнесува 24,5 милиони евра. Сите анекси и зделки договорени во изминатиот период вели се во рамките на проектираните трошоци.

Инаку, на терен, независно од летните горештини, изградбата на новиот објект за уставните судии што ќе ја делат зградата со Државниот архив и Археолошкиот музеј, се одвива интензивно. Истовремено се вршат речиси финалните изведби на фасадата, а колку што дозволуваат просторните услови се работи и на изведба на илуминацијата на објектот.

Паралелно се работи и на проектите за подземно паркирање, паркинг што ќе биде наменет исклучиво за администрацијата од овој објект.

Новиот Уставен суд, кој има највпечатлива стилска градба во тој реон, ќе биде осветлен во неколку бои, во зависност од желбата на надлежните. Ќе постои опција зградата да е осветлена во црвено, жолто и зелено но и во други бои, сите овозможени преку современ систем на осветлување со лед диоди. „Начелно е договорено постојано да бидат осветлени сите 40 столба на објектот“,вели Доневски, задоволен од текот на градежните работи на објектот, кој е предвидено да биде готов до крајот на годинава.

Не е исклучена можноста уставните судии и другите корисници на објектот да се вселат во него на 25 ноември, датум што си го зацртале од владината служба. „Засега немаме добиено налог до кога точно зградата треба да биде готова, односно дали нејзиното пуштање во употреба ќе биде симболично врзано со одреден датум. Можам само да информирам дека сигурно ќе го запазиме рокот за изведба предвиден до крајот на годинава исто како и новата зграда на Министерството за надворешни работи“, вели директорот на владината служба.