Премиера на документарниот филм за Тоше на Јамајка на Канал 5

Документарниот филм за Тоше Проески, снимен за време на неговиот престој на Јамајка во 2006 година, премиерно ќе биде емитуван в петок (6 јуни), на програмата на ТВ Канал 5, a во рамките на музичката емисија „Мјузик бокс“, со почеток во 22,20 часот. Документарниот запис од престојот на нашата ѕвезда на Јамајка, каде што се подготвуваа материјалите за неговиот англиски албум со кој требаше да го освои светот, првпат беше прикажан во рамките на македонската вечер за време на „Евросонг“, што неодамна се одржа во Белград.

Иницијатива за почеток на изградба на спомен-куќата во Крушево

Граѓани на општината Крушево деновиве доставија допис до нашата редакција во кој информираат дека е формиран Иницијативен одбор од жителите на градот, кој бара поддршка од сите граѓани и надлежни институции на Република Македонија со цел да да се преземат конкретни мерки за итно расчистување на имотноправните односи со сопственикот на објектот Мотелче кај Гумење, што е пречка за почеток на градежните работи за старт на спомен-куќата на Тоше Проески. За таа цел, крушевчани стартуваат со акција за собирање потписи во т.н. книга за поддршка, која ќе биде поставена до столбот на Републиката (во центарот на Крушево) и покрај неговиот вечен дом, секој ден од 9 до 13 часот, во периодот од 5 до 15 јуни, по што потоа ќе биде доставена до надлежните институции.