Претходен број

Во февруари 2009 почнува судењето на Бошкоски во Пула

Жупанискиот суд во Пула ги закажа рочиштата за случајот „Раштански Лозја“

Горан Адамовски

Жупанискиот суд во Пула за почетокот на февруари идната година ја закажа главната расправа во судскиот процес што ќе се води против ексминистерот за внатрешни работи Љубе Бошкоски за случајот „Раштански Лозја“. Хрватското судство со ова, се чини, ги запечати напорите на македонското Министерство за правда случајот да биде донесен во земјава.

Македонија и' ги отстапи на Хрватска надлежностите за овој случај, поточно барањето одговорност на Бошкоски, па сега, како што велат експертите, не постои институција отповикување на претходната согласност на Македонија.

„Во врска со кривичната пријава против Љубе Бошкоски, обвинет за тешко убиство, во Жупанискиот суд во Пула е закажана главна расправа на 3, 4, 5, 9, 10, 11, 12, 16, 17, 18, 19 и 20 февруари 2009 година“, се вели во вчерашниот допис од судот во Пула како одговор на прашањата на „Утрински весник“.

Само пред дваесетина дена, Министерството за правда со писмен допис побара од хрватските колеги да им го препуштат „Раштански“ на правосудните органи во Македонија. Според нашето Министерство за правда, не постои правна и законска основа предметот „Раштански Лозја“ да остане во Жупанискиот суд во Пула, бидејќи барањето за враќање на предметот е во согласност и со член 37 од договорот склучен меѓу Македонија и Хрватска за правна помош во граѓанските и кривичните предмети.

Министерот за правда, Михајло Маневски, тогаш за „Утрински“ изјави дека „хрватските судови не се надлежни да одлучуваат за овој предмет, кој им беше незаконски предаден“. Тој и лани во изјава за медиумите јавно ја обвини тогашната владејачка гарнитура дека, наводно, незаконски го предала предметот, при што направила повеќе повреди во процедурата.

Во Јавното обвинителство се категорични дека за нив овој случај е затворен, односно дека не можат да поведат нов судски процес против Бошкоски, особено што хрватскиот Врховен суд го одбил враќањето на предметот во Македонија.

Адвокатката на Бошкоски, веднаш по ослободителната пресуда на нејзиниот клиент за случувањата во скопското село Љуботен во август 2001 година, изјави дека „ако хашкото Обвинителство се жали на пресудата, тогаш постапката продолжува како жалбена и тој не треба да се врати во Пула“.

Македонија пред неколку години и' го отстапи предметот „Раштански Лозја“ на Хрватска, барајќи оваа земја да му суди на ексминистерот, кој како нејзин државјанин таму се обидуваше да се спаси од македонските власти, кои се подготвуваа да го испорачаат во Хаг. Во Скопје им се судеше на преостанатите четворица обвинети во овој предмет. Но, Александар Цветков, Горан Стојков, Бобан Утковски и Митко Кикереков беа ослободени од обвинението дека на 2 март 2002 година во месноста Раштански Лозја кај Скопје со умисла убиле шестмина пакистански и еден индиски државјанин, со цел да ја прикажат Македонија како активен учесник во борбата против глобалниот тероризам.