Претходен број

ДУИ во власта, ДПА конструктивна опозиција

Теута Арифи и Имер Алиу

Од ДУИ нагласуваат дека со влегување во власта е испочитувана желбата на Албанците во Македонија

Гојко Ефтоски

ТЕТОВО - Политичкиот блок на Албанците во Македонија во Владата на Никола Груевски ќе го застапува ДУИ. Оваа определба изминатиот викенд ја обелоденија официјални претставници на двете најголеми партии на Албанците. „Претседателството и Централниот одбор на нашата партија одлучија да учествуваме во новата влада. Прифатени беа постигнатите резултати од разговорите меѓу претседателот Али Ахмети и мандатарот и лидер на ВМРО-ДПМНЕ, Никола Груевски. Нашите органи оценија дека со влегувањето на ДУИ во власта е испочитувана желбата на Албанците во Македонија, а Владата ќе биде со вистинскиот легитимитет“, пренесе потпретседателката Теута Арифи.

„Мандатарот има легитимно право во својата владина коалиција да земе партија за која ќе се определи. Овој пат тоа е ДУИ иако сме ние дол традиционални партнери. Десетдневните преговори меѓу двајцата лидери на партиите - Мендух Тачи и Никола Груевски завршија неуспешно. Ние не се чувствуваме поразени. Ќе дејствуваме како конструктивна опозиција“, го пренесе ставот на ДПА генералниот секретар Имер Алиу.

Според Теута Арифи, ДУИ ја прифатила надградената програма во сто чекори на ВМРО-ДПМНЕ и коалицијата „За подобра Македонија“ во целина. Приоритетите во работата се сведуваат на влегување на Македонија во НАТО и ЕУ, доследно спроведување на Охридскиот договор, продолжување на борбата против криминалот и корупцијата и решавање на проблемот со невработеноста. Арифи рече дека на ДУИ му е доверено едно вицепремиерско место и пет министерства: здравство, економија, труд и социјална политика, локална самоуправа и животна средина и просторно планирање.

Предлозите на ДУИ за кадровски решенија ќе се обелоденат во наредните денови. Неофицијално се вели дека е речиси сигурно Абдуаќим Адеми да биде новиот вицепремиер задолжен за реализација на Рамковниот договор. Бујар Османи ��д Скопје, лекар во Државна болница, ќе го води ресорот здравство, а поранешниот вицепремиер во владата на СДСМ Муса Џафери ќе биде прв човек во Министерството за локална самоуправа. Неџат Јакупи од Гостивар е кандидат за министер за животна средина, а Џелал Бајрами од Куманово за министер за труд и социјална политика. Од трите заменички места единствено се дознава дека Фатмир Бесими ќе биде предложен за заменик во Министерството за внатрешни работи.

Генералниот секретар на ДПА смета дека коалицијата со ДУИ била погрешна особено поради тоа што во изборната трка 80.000 гласа биле украдени. „Тие се гласачки ливчиња, а не гласови на граѓани. Затоа и сметаме дека ДУИ не може да ги претставува Албанците. Ние и во опозиција постојано ќе се залагаме за правата на Албанците“, рече Алиу, кој ги наброја приоритетите на својата партија што Мендух Тачи ги актуализирал на средбите со Никола Груевски. „Изнаоѓање побрз компромис за името на државата, признавање независност на Косово, донесување закон за службена употреба на албанскиот јазик во Република Македонија. Потоа закон за службена употреба на националното знаме, за правата на учесниците во конфликтот во 2001 година, како и запирање на постапката по вратените предмети од Хаг со целосна примена на Законот за амнестија.