Претходен број

Трговците не знаат што да прават со касите

Дел од трговците се плашат дека пак ќе чекаат ред пред сервисите со касите в рака

Александар Пешев

Трговците и специјализираните фирми за фискални каси не знаат кога ќе треба да ги „исклучат“ патриотските фискални сметки и со што ќе ги заменат.

По одлуката на Уставниот суд, според која фискалните сметки со графа „промет од македонски производи“ се неуставни, трговците се плашат од дополнителни трошоци и повторно чекање ред пред фирмите со касите в рака.

Дел од дуќанџиите во и околу Градскиот трговски центар првпат слушаат за нивната веќе пропадната последна инвестиција за фискалните апарати.

„Не ни знаев дека веќе нема да се издаваат патриотските фискални сметки. Сега не сум ни сигурна дали воопшто да ја користам касата“, вели трговец од ГТЦ. „Целата одлука беше неоснована, бидејќи на потрошувачот не му е многу битно дали производот е македонски или странски“, додава таа.

Дел од трговците кои веќе слушнале за одлуката за укинување на патриотските сметки се загрижени. „Најмногу се плашам дека пак ќе чекам ред пред сервис за да ми го сменат софтверот“, вели сопственик на трговско претпријатие. „За сето ова очекувам дека ќе ми биде платена отштета“, нагласува тој.

Во големите маркети се загрижени дека им следуваат нов трошок и дополнителни компликации, посебно во сезона на празници.

Љупчо Васовски, директор за малопродажба во „Тинекс“, вели дека по одлуката на судот сите фискални печатачи на компанијата ќе треба да се однесат на сервис за менување на софтверот. Од „Тинекс“ не се информирани врз кого ќе падне трошокот за повторената интервенција на фискалните печатачи и дали ќе има обесштетување за последната инвестиција за инсталација на патриотскиот софтвер. Се' на се', станува збор за околу 180 фискални уреди во маркетите „Тинекс“ низ земјава, а трошокот за инстала��ија на софтверот изнесувал приближно 100 евра за еден печатач.

„Доколку повторно ќе треба сами да платиме за патриотскиот софтвер да се отстрани од сите фискални печатачи, трошокот би бил од 17 до 18 илјади евра“, вели Васовски. „Згора на тоа, не знаеме кога сето ова ќе треба да се прави, а посебно не' загрижува што одлуката е донесена во сезона на празници“, додава тој. Васовски појаснува дека откако фискалните печатачи ќе поминат на сервис, техничари на „Тинекс“ можеби ќе треба да се ангажираат за повторно внесување на издвоените македонски производи во групата со останатите производи што се продаваат во маркетите.

Од фирмите кои ги продаваат и сервисираат фискалните каси и печатачи велат дека надлежните се' уште не контактирале со нив.

„Не можеме да направиме никакви измени без конкретни инструкции од Управата за јавни приходи. Засега нема никаква одлука“, вели Милан Петровски, директор на „Акцент компјутери“.

Од Управата за јавни приходи засега нема информации дали и кога ќе се изработи упатство согласно со одлуката на Уставниот суд. Останува и непознато дали досега се казнети трговски субјекти за неиздавање патриотски фискални сметки и дали тие ќе бидат обесштетени.