И Расмусен побара храброст од Груевски

Гостите од НАТО видоа како се фингираат прес-конференциите во Македонија

Слободанка Јовановска


Генералниот секретар на НАТО, Андерс Фог Расмусен, ги распрска повторно надежите дека Македонија може да влезе во НАТО без решение за името и дека формулата за тоа би можела да биде референцата БЈРМ.

„Мојата порака е продолжете со реформите, продолжете да придонесувате во мисиите и колку што е можно поскоро дојдете до решение за прашањето за името“, изјави Расмусен на прес-конференцијата со премиерот Никола Груевски. Да биде појасен тој порача дека во одредена фаза се потребни храбри одлуки за да се постигне членството во НАТО и, иако е свесен дека тоа носи политички предизвици, ги охрабрува двете страни, Македонија и Грција, да преговараат и да дојдат до решение.

На прашањето зошто Македонија не влезе во НАТО со почитување на Времената спогодба, Расмусен беше уште покатегоричен. „Ние секогаш носиме одлуки базирани врз консензус. Предуслов за приемот е решение на спорот. Таква беше одлуката на НАТО“, одговори генералниот секретар. Според него, во Македонија постои добра волја за надминување на спорот, а тоа, реформите и учеството во мисиите, се клуч за прием.

„Ги охрабрувам Македонија и Грц��ја да се договорат и во брзо време да најдат решение. Македонија е подготвена за влез во НАТО, но мора да се реши прашањето за името. Ги охрабруваме и двете страни да продолжат со преговорите. Задоволни сме од ангажираноста на македонските мировници во Алијансата. Продолжете со реформите и наскоро ќе бидете де�� од НАТО“, изјави Расмусен на прес-конференцијата. Според него, иако Македонија постигнува напредок во исполнувањето на НАТО-стандардите, остануваат  уште значајни реформи што треба да бидат направени во земјата.

Премиерот Груевски изјави дека членството во НАТО останува еден од највисоките приоритети на Македонија, изразен преку високата поддршка кај граѓаните и со учеството во мисиите на Алијансата. Во контекст на есенскиот самит во Лисабон, рече Груевски, Македонија ќе продолжи да работи на отстранување на главната пречка за членството во НАТО.

„И понатаму продолжуваме да бараме решение за проблемот. Од наша страна се прави максимум, а тоа го очекуваме и од другата. Дотогаш Македонија останува стабилен партнер на НАТО. Продолжуваме со реформите и со нашите мисии во НАТО“, порача македонскиот премиер. На барањето да прецизира дали во Грција нема добра волја за решавање на спорот, премиерот Груевски одговори дека доколку имало доволно желба досега спорот ќе се решел.

Прес-конференцијата на Груевски со Расмусен доби срамен тек кога портпаролот на Владата, како и секогаш, сакаше да им даде да поставуваат прашања исклучиво провладините медиуми, по редоследот што секогаш се повторува. Откако по упорно барање го здогледа новинарот од Канал 5 и му даде збор, гласноговорникот Мартин Мартиновски ја повика новинарката на Сител да постави прашање, иако таа не го бараше тоа, па и не беше свесна еден момент дека е во центар на вниманието.

Ваквото сценарио предизвика смеа меѓу новинарите и збунетост кај гостите, додека нашите министри гледаа надолу, бидејќи стана очигледно каков е односот на премиерот кон медиумите. Притоа Расмусен мораше да одговори на „патриотското“ прашање, кое редовно на сите прес-конференции со наши функционери го добива од македонските новинари, кое, пак, им го нарачуваат од кабинетите на властите.

„Дали се чувствувате комотно што Македонија учествува во толку мисии, а не е членка на Алијансата“, праша Канал 5, иако истото тоа го праша Сител на последната прес-конференција на Груевски со Расмусен во Брисел. Тогаш генералниот секретар луто порача дека Македонија учествува во мисиите, бидејќи сама има интерес да го прави тоа, а сега беше поблаг, па одговори дека учеството во Авганистан не е услов за членство и оти од 46 земји кои се таму дури 18 не се членки на Алијансата.

Расмусен, по разговорите во Владата, имаше средби и со лидерот на ДУИ, Али Ахмети, како и на СДСМ, Бранко Црвенковски. Ахмети потоа изјави дека Расмусен не ги критикувал туку ги пофалил чекорите што ги прави Македонија за членство. „Не мислам дека Македонија нема да успее да се приклучи на НАТО и мислам дека многу бргу ќе ги почне преговорите со ЕУ“, тврдеше Ахмети, но не го дообјасни овој наплив на оптимизам.

На средбата во седиштето на СДСМ, Расмусен се интересирал за ставот на Црвенковски во однос на референдум за името. Црвенковски изјавил дека ако тоа е неопходно за напредок во спорот, СДСМ нема да се спротивставува. (С.Ј.)