Анкета на „Утрински“
Каде ќе летуваат политичарите
Милошоски на Јадран, другите се сончаат до Груевски
Македонската политичка елита во овие жешки денови се' уште не размислува каде ќе оди на одмор затоа што политичарите, како што велат, пред себе имале многу работни обврски. Прашавме неколкумина од власта и од опозицијата каде ќе заминат на летување, но најчест одговор е дека се' уште не знаат каде ќе одат да се одморат по напорниот период за време на изборите. Некои се' уште ја кројат Владата, други чекаат таа да се изгласа, па потоа да заминат на летување, на трети им се ближат одбележувања на значајни настани и празници, а некои, едноставно, не практикувале да одат на летување. Поконкретен одговор добиваме само од досегашниот министер за надворешни работи, Антонио Милошоски, кој откако се откажа од функцијата, си го испланира и одморот, па ќе се обиде да ги надомести отсуствата од дома поминувајќи го летото со сопругата и синот. А каде планира да замине на одмор премиерот Никола Груевски? Од неговиот кабинет не успеавме да добиеме одговор на ова прашање .
Антонио Милошоски,
пратеник
„Се разбира, одам со сопругата и со синот во Хрватска, во близина на Сплит. Имаме таму некои пријатели од студентските денови. Прв пат ќе летувам во Хрватска, досега не сум бил. Оваа година летниот одмор ќе го поминам на јадранскиот брег“, вели Милошоски.
Али Ахмети,
лидер на ДУИ
Од партијата на Ахмети информираат дека нивниот лидер вообичаено не оди на летување, но и актуелните случувања со составувањето на новиот владин кабинет, како и наближувањето на 10-годишнината од Рамковниот договор го прават лидерот на ДУИ премногу зафатен за да размислува за одмор.
Бранко Црвенковски,
лидер на СДСМ
Ниту лидерот на опозициската СДСМ, Црвенковски, не знае каде и дали воопшто ќе отиде на одмор. „Се' уште не одлучил, има многу работа“, одговараат од блиското опкружување на Црвенковски.
Елизабета Канческа-Милевска,
министерка за култура
Министерката за култура ја чекаат многу обврски пред илинденските празници, 8 Септември, отворањето на Музејот на ВМРО и на Триумфалната капија. Поради тоа, се' уште не одлучила каде и кога ќе замине на одмор. Но, кога и да замине и дали тоа ќе биде на море, езеро или планина, за неа било важно да биде заедно со своето семејство, сопругот Красимир и синот Јаков.
Абдулаким Адеми,
вицепремиер за Рамковниот договор
Ниту вицепремиерот за спроведување на Рамковниот договор нема да оди на одмор. Немал време поради директниот ангажманот во преговорите за составување на новата влада. Паралелно, Адеми е ангажиран и околу одбележувањето една деценија од Рамковниот договор, за што се интензивираат подготовките.
Никола Тодоров,
министер за образование
„Мене и вака и така ме фаќате жив во (гаќички???) на плажа. Не знам дали ќе одам и кога“, рече Тодоров
Ѓорге Иванов,
претседател на државата
„Претседателот на државата ќе оди на годишен одмор, но поради обврски во државава и политичките случувања, се' уште нема решено ниту кога ниту каде ќе оди“, информира Кабинетот на претседателот Иванов.
Гордана Јанкулоска,
министерка за внатрешни работи
„Ќе одам со сопругот, но уште не сме одлучиле дефинитивно каде ќе го поминеме летниот одмор.
Минатата година бевме во Турција и одлично си поминавме, па и годинава Турција ни е во потесниот избор“, одговара Јанкулоска.
Трајко Вељаноски,
претседател на Собранието
Премногу е рано, но најверојатно по одбележувањето на Илинден на 2 Август, до кога ќе работи и Собранието, претседателот на парламентот Вељановски се надева дека ќе најде една недела слободна за да замине на годишен одмор со своето семејство. Но ниту тој не знае каде ќе го помине летниот одмор, бидејќи се' уште не донел одлука за тоа. |
