Признанија за најдобрите архитекти за 2010 на град Скопје

„ДСЦ дизајн - Скопје“ е добитник на годинашнава главна награда за архитектура на град Скопје. Признанијата на архитектите Звонко Тасевски и Крсте Петров за проектот административна зграда на „Граве недвижности“ им ги додели градоначалникот Коце Трајановски завчера во рамки на манифестацијата „АСК - архитектура Скопје 2010“.

„Оваа манифестација веќе единаесет години претставува место каде што се среќаваат архитектонските идеи, проекти и визии што го креираат лицето на Скопје и проникнуваат во неговата душа. Големата награда на архитектура АСК 2010 оддава почит на архитектите што даваат посебен придонес Скопје да добие лик на вистинска метропола“, рече Трајановски.

Добитници на признанијата за посебен придонес во архитектурата се архитектите на „Делта инвест“, Никола Велковски, Светлана Јончевска и Марко Трајковски за проектот за административно-деловен објект со магацински простор СТИХЛ, во индустриската зона „Визбегово“, како и Јовица Стефановски, Катерина Петрушевска и Ивана Стефановска од фирмата „Јасива“ за проектот за апартманско-деловен објект. Наградени се и архитектката Зорица Блажевс��а за проектот ЕКО-ХАУС и ателјето „Ајвар“ за проектот за катна гаража во Аеродром. (С.Р.)