СДСМ вели НЕ

Партиското раководство одлучи да не учествува на локалните избори. Сите надежи се свртени кон посетата на еврокомесарот за проширување, Штефан Филе, наредната недела

Слободанка Јовановска
Татјана Поповска


Доколку нема предвремени парламентарни избори, СДСМ и опозициските партии што ги предводат нема да учествуваат на локалните избори. Ова е договорот што го потврдил партиското раководство на прексиноќешниот состанок, кој се одржа по посетата на директорот на Директоратот за проширување на ЕУ, Стефано Санино, но и по изјавата на премиерот Никола Груевски дека нема да има предвремени парламентарни избори.

Тоа значи дека Македонија е на прагот на уште поголема политичка криза доколку во последен момент не се најде некакво решение. Сите надежи се свртени кон посетата на еврокомесарот за проширување, Штефан Филе, наредната недела, кој како претходница завчера попладне го испрати својот човек од доверба Санино, кој се сретна со премиерот Никола Груевски, лидерот на опозицијата, Бранко Црвеновски, шефот на државата, Ѓорге Иванов, и претседателот на ДУИ, Али Ахмети.

Нема информации дали на овие средби било понудено конкретно решение, кое доколку биде прифатено од сите политички субјекти ќе го соопшти еврокомесарот Филе при својата посета на Скопје. Единствено што може да се дознае е дека Санино вршел притисок и врз ВМРО-ДПМНЕ и врз СДСМ да отстапат од цврстите позиции, да попуштат, за да може да се најдат на половина пат, со што ќе се избегне подлабока политичка криза. Но, по изјавата на премиерот Груевски дека нема да има предвремени избори, која беше дадена пред неговата средба со европскиот претставник и по вчерашните цврсти позиции на СДСМ за бојкот на локалните избори е јасно дека двете најголеми политички партии не отстапуваат од своите позиции.

Во СДСМ уверуваат дека за разлика од 2011 година, кога во последен момент одлучија да отстапат и да прифатат парламентарни избори без никакви услови, овој пат намерите за бојкот им се цврсти и ќе одат до крај. Велат дека комисијата што ја понудил Груевски може да биде дел од решението, но никако не може тоа да биде основа на договорот. Оценуваат дека овој предлог и најавите за прифаќање на препораките од ОБСЕ за изборните правила се само негов обид да глуми конструктивност, но на тој начин тој ги релативизирал вистинските проблеми. Категорични се дека без предвремени парламентарни избори нема да учествуваат ниту на локални, и од тој услов нема отстапување. Досега, велат во СДСМ, не им била понудена можноста за предвремени избори, што значи дека бојкотот е извесен.

Партиски извори додаваат дека меѓународната заедница врз нив врши голем притисок. Истовремено тврдат дека дипломатите се свесни дека најголемата одговорност лежи кај Владата, која е задолжена за сите процеси во земјава.

Вчера лидерот на СДСМ Бранко Црвенковски имал средба со претседателите на коалициските партии ВМРО-НП, ЛДП и НСДП Љупчо Георгиевски, Андреј Жерновски и Тито Петковски на која им ги пренел деталите од разговорите со Санино но и позициите на опозицијата на три дена пред истекот на рокот за доставување кандидатури за градоначалници и советнички листи. Детали од средбата вчера никој не сакаше да соопшти.

Во ВМРО-ДПМНЕ вчера не можеше да се дознае какви биле препораките од европретставникот Санино, ниту дали врз нив имало притисок да попуштат. Партијата на Груевски доби голема поддршка од европарламентарците од сродните партии на ВМРО-ДПМНЕ, народните партии во Европскиот парламент. Сепак поранешниот претседател на Европскиот парламент Јиржи Бузек во неформален разговор со новинарите рече дека по реакцијата на медиумите и по последните изјави на политичките лидери сфатил дека треба да се сретне и со опозицијата, па самиот побарал средба. Бузек побарал од опозицијата да се вратат во парламентот, да учествуваат на локалните избори и да се формира анкетна комисија. Бузек ги охрабрил социјалдемократите да одат на локални избори, бидејќи атмосферата за добивање одлука за преговори од ЕУ била подобра од последните неколку години.

„Проблемот со името треба да се реши во текот на преговорите за членство, а не до јуни. Во ваква збрка во земјата таа одлука ќе биде невозможна“, коментира Бузек.

Во врска со буџетот тој на социјалдемократите им порачал дека било очигледно дека сакаат да го блокираат. Но за инцидентите на 24 декември оце��и дека власта направила грешка со одлуката (алудирајќи на исфрлањето на пратениците од опозицијата), која била многу строга.