Вранишковски приведен во Бугарија како српски граѓанин

На 1 ноември Интерпол Скопје распиша потерница по српскиот егзарх

Билјана Јовановска

Српскиот егзарх Јован Вранишковски прексиноќа околу 17,30 часот беше приведен на граничниот премин Калотина во Бугарија на пат кон Србија по меѓународната потерница што ја распиша Интерпол Скопје на 1 ноември. До затворањето на весникот се' уште траеше 24-часовниот притвор во просториите на граничниот премин и се очекуваше одлуката на бугарското обвинителство.

Според Лора Љубенова, прес-аташе на граничната полиција на Министерството за внатрешни работи на Бугарија, Вранишковски е приведен како српски граѓанин, а бугарските закони во вакви случаи предвидуваат и можност за продолжување на притворот на 72 часа. Во меѓувреме, тие побараа дополнителни податоци од нашето МВР, кое синоќа чекаше известување дали Вранишковски ќе биде веднаш изведен пред бугарскиот истражен судија или ќе му биде изречен екстрадиционен притвор.

Доколку бугарската полиција се одлучи на екстрадиционен притвор, тогаш би требало да го известат Интерпол Скопје, за МВР да го информира Министерството за правда за да ја з��почне постапката за екстрадиција. Дури потоа, ако Бугарија одлучи да го екстрадира, се договора каде и кога ќе се изврши предавањето на Јован Вранишковски, кому Апелациониот суд во Битола му ја потврди затворската казна од две и пол години поради финансиски проневери во епархиите на Македонската православна црква.

Вранишковски последен пат престојуваше во Македонија на 27 јануари, на Светосавската академија, која во Домот на АРМ ја одржуваше Демократската партија на Србите во Македонија на Иван Стоиљковиќ. Практично, ексвладиката тогаш го искористи терминот за поднесување жалба и со своето присуство како „архиепископ на ПОА“ ја разбранува македонската јавност. Последните години тој престојува во Србија или во солунските преградија, зашто митрополитот на Солун, г. Антим, му забрани да служи во градските цркви.

За притворот на Вранишковски вчера информираше и сајтот на т.н. ПОА, додека Српската православна црква, која во Патријаршијата во Белград го започна заседанието на Саборот, до доцна попладнето не го прокоментира притворањето. Но, и без тоа, јасно е дека решавањето на спорот на нашата Црква со Српската црква ќе чека некои други времиња, бидејќи црковен Белград во повеќе навратил барал Вранишковски да биде ослободен од кривичниот прогон во Македонија, без оглед на потврдените судски пресуди.