Претходен број

За Бучковски 3,5 години затвор

На иста казна судот го осуди и генералот Методи Стамболиски, а другите тројца на по три години затвор

Љубиша Станковиќ

Поранешниот премиер и некогашен министер за одбрана, Владо Бучковски, и ексначалникот на Генералштабот на АРМ, Методи Стамболиски, се осудени на 3,5 години затвор за набавките на резервни тенкови делови во 2001 година.

За останатите тројца обвинети Нелко Менкиновски, раководител на Секторот за логистика, Ацо Ѓурчески, советник во МО, и Митре Петковски, директор на МЗТ-ФОП, судот изрече казни во траење од три години затвор.

Обвинителството ги товареше дека со набавките на резервни делови за армиските тенкови го оштетиле буџетот за над два милиона евра.

„Пресудата е скандалозна“, оцени вчера Бучковски по изрекувањето на пресудата, од која беа изненадени сите.

Изрекувањето на пресудата не траеше повеќе од една минута и во тие шеесетина секунди судијката Вангелина Маркудова соопшти дека сите петмина обвинети сториле злоупотреба на службената положба и овластување, а потоа ја соопшти санкцијата, како и висината на трошоците за постапката и штетата која осудените ќе треба солидарно да ја надоместат.

Бранителите на обвинетите очекуваа повлекување на обвинителниот акт, а кога не се случи тоа, веруваа дека судот ги прифатил нивните докази дека обвинетите се невини.

„Правната битка ја добивме во петокот во судницата. Во изминатите 13 месеци јас и другите обвинети во целост докажавме дека сме невини, но очигледно коректноста на судијата беше скршена во последните неколку денови. Што се случуваше од петокот до денеска, веројатно, знае само судијката Вангелина Маркулова“, изјави Бучковски.

Поранешниот прв човек на Армијата на Македонија, генералот Методи Стамболиски, смета дека оваа пресуда претставува доказ за тоа колку судот е независен и колку политиката има влијание врз судството, но тој е убеден дека на крајот ќе се докаже дека тие се невини. Неговиот бранител Трајче Китановски смета дека судот постапил според една конструкција од обвинителен акт и покрај тоа што доказите оделе во прилог на неговиот клиент.

Свои коментари за пре��удата дадоа и поранешните јавни обвинители, сега адвокати, Јован Трпеноски и Стеван Павлевски, а со нивните ставови е согласен и бранителот на Владо Бучковски, Никола Поленак, кој рече дека оваа „пресуда не се заснова на факти и докази“.

Случајот наречен „Резервни тенковски делови“ се однесува на непланирана набавка на делови за армиските тенкови „Т-55“ кон крајот на 2001 година, само неколку месеци од формалното примирје. Генералштабот на АРМ, по добиени разузнавачки сознанија за постоење т.н. пролетна офанзива, до Министерството за одбрана поднело барање за ремонт на тенковите.

Станува збор за непланирана набавка, какви што во тој период АРМ имала многу, а за кои тогашната влада формирала посебен фонд токму за ваквите неопходни набавки, и на војската и на МВР. Како понудувач на потребните делови за трансмисија се јавува скопската фирма МЗТ-ФОП, чија дејност, всушност, е наменско производство на делови. Договорот помеѓу МО и МЗТ-ФОП е склучен на 15 октомври 2001 година, а како негов потписник се јавува и тогашниот министер Бучковски. Испораката на деловите МЗТ-ФОП ја изврши во целост и во законски предвидениот рок, но затоа, пак, МО преку судско порамнување и застапување од Јавното правобранителство, на суд, се избори испорачаното да го платат на рати.

Веќе следната година во јавноста излезе аферата за набавка на вишок делови за тенковите, а против Бучковски беше поднесена кривична пријава за злоупотреба на службената положба. Цели десет месеци Јавното обвинителство го истражуваше случајот со тенковските делови и на крајот донесе одлука пријавата да биде отфрлена. Но, по пет години, за истиот случај и за истото дело, поднесена е нова пријава за Бучковски.

Сето ова се случуваше пред ланското чествување на празникот Илинден, но место да му биде симнат пратеничкиот имунитет и да му биде одреден притвор, Бучковски го прекина годишниот одмор и се врати во земјата. Неговото појавување пред судот на 1 август 2007 година беше проследено со масовни протести, по што му беше укината мерката притвор што му беше одредена во отсуство.

Судскиот процес за петтемина обвинети за резервните тенковски делови започна на 29 октомври минатата година. Обвинетите се бранеа дека во случајот нема ништо спорно и дека репарирањето на тенковите било потреба. На распит беа повикани бројни сведоци, а меѓу нив и луѓе од военото разузнавање, кои тврдеа дека репарирањето на тенковите требало да биде реализирано токму поради оперативните сознанија што упатувале на можност од пролетна офанзива од припадниците на ОНА.

Во изминатите 13 месеци, колку што траеше овој судски процес, обвинетите и бранителите обезбедуваа докази за да ја потврдат нивната невиност. Во тој правец одеше и изработката на вештиот наод и мислење, како и неговото дополнение.

Во завршниот збор Бучковски рече дека разликата од 2002 и минатата година е во тоа што тогаш Јавното обвинителство се откажало од гонење, а сега се согласило на такво нешто, но овој пат, покрај него, осомничило и четворица други, од кои двајца извесно време минаа и во притвор.