Насловна

Милошоски сака да абдицира

Шефот на дипломатијата посакува амбасадорска функција во Лондон

Светлана Унковска

Досегашниот министер за надворешни работи, Антонио Милошоски, не сакал да остане на истата функција во новата Влада, велат извори блиски до него.

Наводно, тој деновиве побарал средба со мандатарот за состав на новата Влада, Никола Груевски, кому му соопштил дека не сака повеќе да раководи со Министерството на чие чело беше во претходните два мандата на владата на ВМРО-ДПМНЕ.

Вчера не успеавме да стапиме во контакт со него за да ги потврди или да ги демантира ваквите информации, бидејќи на неговиот мобилен телефон се јавуваа вработени од неговиот кабинет во МНР.

Милошоски, сепак, како што тврдат нашите извори, сакал да остане во дипломатијата. Тој со семејството, наводно, преферирал да замине за Лондон каде што би ја вршел должноста амбасадор на Македонија во Велика Британија. Во амбасадата во Лондон, која покрај Велика Британија ги покрива и Република Исланд и Ирска, сега е Марија Ефремова, која е назначена за амб��садор од октомври 2007 година. На амбасадорката Ефремова и' истекува мандатот за неколку месеци и поради тоа Милошоски почнал да ја мерка оваа дипломатска фотелја уште пред извесно време затоа што, како што велат истите извори, наводно, сакал помирен живот и повеќе да биде со своето семејство, што беше невозможно додека беше министер за надворешни работи.

Милошоски е личност од најблиското опкружување на лидерот на премиерот Груевски. Но, нашите соговорници велат дека одамна му тежело тоа што на негово салдо одело тапкањето во место со проблемот со името. Но, се зборува и дека Милошоски сакал да го одбегне интензивирањето на притисокот за решавање на проблемот со името.

За време на разговорот со премиерот Груевски, наводно, Милошоски му сугерирал две-три имиња што би можело да го заменат на позицијата прв човек на Министерството за надворешни, но не се открива кои личности ги посочил. Тој уште за време на изборите, на кои беше носител во Петтата изборна единица, во едно интервју и самиот изјави дека отсуството од дома и патувањата ги чувствува како најтежок дел од извршувањето на функцијата, но и дека најтешката пречка со која се соочил е спорот со Грција. Запрашан дали ако победи ВМРО-ДПМНЕ ќе остане министер за надворешни работи, тој рече дека останува на располагање за секој иден ангажман, но дека чувствува наклонетост за функции што можат да дадат придонес за македонската дипломатија.