Трајковски: Таму не се знае каде се А1 и „Време“, а каде прават смоки

Светлана Унковска

„Моментно можам да изразам лично задоволство за квалитетот на материјалот што е пронајден во хартиена форма, што значи до крајот на годинава ќе излеземе со нацрт-записникот од даночниот наод. Многу ми е жал што се направи обид да се пренасочи вниманието дека УЈП со Финансиската полиција и со МВР врши упад на медиум. Од овој успех што го постигнавме со обезбедување документација, можам да гарантирам дека дури да беа таму сместени и Си-Ен-Ен и Би-Би-Си, а не А1 телевизија, УЈП ќе постапеше токму на истиот начин. Не признаваме никакви форми на паравани и заштитници на вакви тешки злоупотреби во даночната сфера“, ова вчера го рече директорот на УЈП, Горан Трајковски, на пресoт, на кој покрај медиумите, присуствуваа и претставници на меѓународни институции.

Завчерашните случувања пред А1 телевизија Трајковски ги нарече обид за дефокусирање на јавноста. „УЈП, рече тој, не ја интересира уредувачката политика не само на А1 телевизија, туку на ниту еден друг медиум“. Цел на засилената контрола било одлевањето на околу 7,5 милиони евра во странски држави, познати како „даноч��и раеви“. Првиот човек на Управата нагласи дека станува збор за контрола на работењето на неколку фирми, сите регистрирани на „Перо Наков“ б.б. или на број 60, каде што функционираат вкупно 40 фирми.

„Таму не се знае кои простории се на А1, до каде е ’Време‘, а од каде почнува производството на смоки“, вели Трајковски. Според првиот човек на УЈП, контролирани се печатницата „Мисирков“, „Плус продукција“ (која ги издава весниците „Време“ и „Шпиц“), потоа „Акс-стра“ и „Акстра трејд“, која звучи исто со претходната, но се работи за две фирми. Исто така, инспекција е извршена и во „Синин“, потоа во „Време ЕЧ“ и „Плус ком“. По увидот во овие фирми, со судски налози од истражен судија е извршен и целосен претрес на Финансиската полиција, а дополнителен судски налог бил обезбеден и за фирмите „Хедис маркет“ и „Хедис компани“. Проблемите во работењето на инспекторите се јавиле поради тоа што како сопственици на голем дел од фирмите се јавуваат лица кои не се државјани на Македонија и со „купувањето идентитет на странски државјани“ биле вршени големи даночни измами, а ниту еден од семејството Рамковски не бил предмет на контролата. По извршената контрола, запленети се 45 компјутери и еден сервер, како и повеќе регистри со документи, додека уште еден сервер е запечатен поради неможноста да се транспортира. Утврдено е дека фирмите не платиле околу 1,6 милиони евра ДДВ.

„Најинтересна за нас беше фирмата ’Акстра трејд‘, која била поврзана со ’МиА бевериџис’, компанија за производство на сокови, која со своето функционирање сакала за брзо време да исчезне од правниот простор во земјава, оставајќи зад себе загуби од пет милиони евра само спрема државата. На таа компанија, чиј сопственик е странски државјанин од Блискиот Исток, веќе и' се запленети објектите, а според нашите сознанија тој е избеган во Грција. Постојат индиции дека 7,5 милиони евра преку ’Астра трејд’ се прелеани во држави кои се даночен рај“, посочи Трајковски.