Втора мајка за изградба на Менхетен во Аеродром

Инвеститорот ќе биде обврзан во рок од шест години да изгради три облакодери високи помеѓу 33 и 125 ката

Деспина Трајковска


Државата не се откажува од футуристичкиот проект за изградба на три повеќенаменски облакодери во Аеродром високи помеѓу 33 и 125 ката, слични на познатиот Менхетен во Њујорк. Иако пред половина година за парцелата помеѓу бензинската пумпа на „Макоил“ и воениот комплекс „Гоце Делчев“ немаше заинтересиран купувач, Министерството за транспорт и врски повторно го продава плацот. Овој пат, поевтино и со изменети услови за заинтересираните купувачи.

За првата лицитација почетната цена за квадратот земја беше утврдена на 7.000 денари, а сега таа е намалена и изнесува 6.000 денари. Претходниот пат површината на понудениот плац изнесуваше 21.247 квадратни метри со површина за градење од 10.000 квадрати, а во сегашниот повик се нуди градежна парцела од 21.150 квадратни метри со површина за градба од 14.873 квадрати. Во првиот обид за продажба на плацот државата инсистираше инвеститорот да изгради три облакодери со минимум 25 ката, додека сега условот е висококатниците да не бидат пониски од 33 ката со можност за изградба и до 124 ката. И овој пат од Министерството за транспорт потенцираат дека најголеми шанси да го купи земјиштето ќе има оној што ќе понуди најголема катност.

Согласно со јавната објава за продажба на парцелата, идниот сопственик ќе биде обврзан во рок од шест години да го реализира проектот. Детаљниот урбанистички план предвидува изградба на три висококатници во кои освен простор за домување ќе има и деловен простор, трговски центри, а дадена е можност во комплексот дел од просторот да се искористи за културни и верски намени, како и за спорт и рекреација.

Инаку, освен продажба на овој плац, на подрачјето на Аеродром државата нуди и две парцели наменети за изградба на хотели. Станува збор за две локации во непосредна близина на мостот „Близнак“ и спортската сала „Јане Сандански“, по должината на кејот на Вардар. Едната е со површина од 5.175 квадратни метри, а другата од 11.972 квадрати. Почетната цена за квадратен метар и на двете парцели изнесува 4.600 денари. И двата хотела, согласно со ДУП, ќе можат да достигнат висина до пет ката. Инаку, за разлика од актуелните и веќе продадени парцели за хотели во централното градско подрачје, за овие во Аеродром не се инсистира на посебни услови кај заинтересираните купувачи во однос на поседување синџир на познат бренд хотели и слично.