Насловна

Интервју

Ќе ја добиеме и оваа битка за ослободување на Љубе

Виолета Бошкоска, сопруга на лидерот на ОМ

Гордана Дувњак



Како сте госпоѓо Бошкоска? Изгледате доста уморно и ослабено.

Се чувствувам многу исцрпено и се' уште не можам да се соземам по шокот од апсењето на мојот со��руг, кој се случи ден по изборите. И натаму тврдам дека станува збор за монтиран политички процес, кој има цел да го дискредитира мојот сопруг како личност. Власта сака да прикаже дека „ете и тој е криминалец“, а не само оние за кои тој јавно зборуваше на митинзите и во јавните настапи. Во отсуство на Љубе, партијата Обединети за Македонија е изложена на жесток притисок за целосно уништување, бидејќи во изминатиот период се наметна како остар критичар на власта.



Дали можевте да претпоставите дека Вашата дневна маршрута по изборите ќе биде на релација истражен затвор - суд?

Буквално сум растргната сум на сите страни. Секој ден или на два дена му носам храна на мојот сопруг во Шутка, се среќавам со адвокати, одам по институции, во партија... Бев една недела во Хрватска за да видам што се случува со нашиот семеен бизнис, бидејќи сме во екот на туристичка сезона и да беа околностите поинакви, веднаш по изборите ќе заминев таму и веќе ќе примав и ќе испраќав гости. Но, животот ме научи дека човек мора да се соочува со постојани искушенија и со нив мора да се справува.



Семејството Бошкоски е повторно во центарот на вниманието со последната кражба на сефот во Вашата семејна куќа. Кога забележавте дека се случило тоа?

Во последно време ретко сум дома. Дека нешто недостига, со синот забележавме при моето враќање од Хрватска. Сефот се наоѓаше во спалната, но јас откако се случи апсењето на Љубе, имам отпор да влезам во таа соба и спијам во собата на ќерка ми Кате на катот. Во сефот се наоѓаа два пиштола на Љубе и еден мој, за кои имаме уредна дозвола, како и одредено количество муниција. Проверивме да не е случајно претходно однесен во куќата во Челопек, но и таму го нема сефот.



Како го објаснувате тоа што нема траги на насилно влегување. Дали се сомневате на некого?

Нема траги на насилно влегување бидејќи кај нас обично се' е отклучено. Не се сомневам во никого и не можам да кажам кои биле мотивите за провалување во куќата, но претпоставувам дека некој мислел оти во куќниот сеф има пари.



Колку пати сте се виделе со Бошкоски и каква е неговата психичка состојба?

Двапати го посетив во истражниот затвор, а требаше да се видиме и при увидот во доказниот материјал. Но, за жал, се одложи бидејќи немаше слободна судница. Разбравме дека истражниот судија бил зафатен во наредните два дена и затоа очекувам дека по истекот на 30 дена, ќе му биде продолжен притворот. Љубе е видливо ослабен, но добро се држи.



Зошто го сменивте адвокатот?

Мојот сопруг има особина да биде опкружен со многу луѓе. Ангажираше и дополнително адвокати, како што се Драган Гоџо, Донче Наков и Стеван Павлевски. Г-динот Љубомир Михајловски сака да работи сам, а не во тим, па реши да се повлече.

Дознавте ли точно за што го товарат Бошкоски, кој му се јавил критичниот ден за да му ги даде парите, кој стои зад претходните две исплати што ги споменува полицијата?

Јас не можам точно да кажам. Велат дека е тоа поради финансирањето на изборната кампања, но и тука има многу нелогичности бидејќи Љубе и не беше шеф на изборната партиска кампања. Не ми спомнал дека некој му дал пари или требало да му даде. Чаршијата може да зборува се' што сака.



Дали Бошкоски знаеше дека е цел на специјални истражни мерки и дека е прислушуван?

Знаевме уште за време на Нова година, а телевизија Сител дури и јавно објавуваше најразлични шпекулации. Но, Љубе како Љубе, си остана доследен на себе и цело ова време тврдеше дека ги почитува законите на оваа држава и нема од што да се крие.



Како Вашето семејството ова го поднесува што Ви се случува?

Многу тешко, иако имаат веќе искуство и се навикнаа татко им да не е дома и да биде апсен и во притвор. Сепак, најтешко го поднесува помалиот син Филип, кој непосредно пред денот на изборите имаше и закани дека татко му ќе заврши како во „Долина на волците“. Четири дена по неговото апсење, заедно со сестра му замина во Хрватска. Јас останав овде со постариот син Панче и со мајка му на Љубе. Трчаме, се бориме..



Како апсењето на лидерот на ОМ се рефлектираше врз партијата?

Она што се случи со Љубе внесе голем шок и вознемиреност во партијата, но таа успеа да ја задржи својата кохерентност. Функционира, зачувани се општинските организации. Но, имаме голем проблем бидејќи Љубе е единствен потписник на сметките. Со партијата раководи претседателство, од кое поради поголема функционалност, неодамна се избрани петмина лица да ја координираат партијата во овој исклучително тежок период.



Рековте дека власта се обидува да ја уништи партијата. На кој начин го прави тоа?

По изборите, сите се изложени на силен притисок и на закани и трпат голема штета. За жал, некои и ќе си заминат, но барем ќе се прочисти партијата и ќе остане искреното членство.

Најмногу на удар се носителите на листи, па некои од нив се избркани од работа или имаат големи проблеми, на други не им излегува финансиска контрола од фирмите, на трети им е загрозен бизнисот, им се затворени казината и кафулињата. А Љубе, кој беше носител на листа во „тројката“, заврши во притвор. Но, засега сите тврдат дека ќе го издржат овој притисок и остануваат во партијата.



Дали некој покажува лидерски амбиции?

Засега не.



Колку се точни информациите дека ВМРО-ДПМНЕ се обидува од внатре да ја преземе партијата?

Јас немам сознанија за такво нешто. Од она што го гледам секојдневно, се надевам дека тоа не е можно. Кој има интерес да преземе партија што изгубила на избори и има големи долгови? Но, ќе покаже времето.



Се зборува дека партијата должи насекаде и дека е многу веројатно да Ве исфрлат од партиските простории на улица?

Можно е такво нешто. Не е тајна дека имаме проблеми со неплатените кирии. Се обидуваме да се договориме, да побараме одложување на роковите, а доколку е можно, да земеме и помал простор. Но, ако не успееме да дојдеме до договор, ќе се бара помал стан на друго место.



Колку во овие моменти добивате поддршка или, пак, по старото добро правило, кога колата ќе тргне надолу, сите вртат грб?

Секојдневно ме застануваат луѓе на улица, се интересираат, даваат поддршка, но повеќе затскриено, бидејќи се плашат. Можам да ги разберам, такви времиња се. Има луѓе што отворено кажуваат дека им е страв и велат, вас ве следи полицијата и не е безбедно. Но има и такви што сами се нудат да помогнат, а порано не го правеле тоа.



Колку ова што Ви се случува е дежа ви. Допираат ли и до Вас муабетите дека Љубе можеби се спасил од Хаг, но нема да може од македонските судови и ќе заврши в затвор?

Сега е најтешко, бидејќи ударите ги добиваме од своите и затоа и толку боли. Доаѓаат и до нас тие муабети. Дури слушнавме и дека градоначалникот на Аеродром на некој партиски состанок рекол дека Љубе ќе биде осуден од 8 до 10 години. Значи, предвреме го осудиле.

Но, нема да им помине. И досега се обидуваа на сите можни начини да го оцрнат. Дека бил предавник, го предал Јохан.

Свесни сме дека судството е зависно од власта и прави се' што сака ВМРО-ДПМНЕ. Но, не се откажуваме. Битката очекувам дека ќе ја добиеме преку медиумите и јавноста, домашните и меѓународните институции за човекови права. Веќе ги посетивме ОБСЕ, Хелсиншки комитет, народниот правобранител, амбасадите. Има олку многу прекршувања на постапката што не може да се затвори очи пред тој факт.



Дали добивате некакви закани за да се откажете?

Сега не. Пред апсењето, имавме закани.



На свој грб го пренесовте целиот товар за докажување на невиноста на вашиот сопруг во Хаг. Ќе најдете ли сила и овој пат да го направите тоа?

Секако. Но, свесна сум дека судовите наскоро ќе одат на одмор. Не очекува голема битка, но се надевам дека ќе ја добиеме и оваа. Две веќе добивме: Хаг и Раштански. Иако судскиот процес во Пула е во мирување.



Бошкоски еднаш не ве послуша кога му рековте да ја батали политиката. Верувате ли дека ќе ве послуша следниот пат?

Само да заврши се' во најдобар ред, а потоа ќе видиме. Овој пат ќе биде поинаку. Или ќе се откаже заради семејството или, пак, јас ќе си заминам и ќе го оставам да си води политика.



Се каете ли што се вративте во Македонија?

Многу пати. Со Панче деновиве помалку на шега си велиме - сега имаме полномошно и можеме слободно да ја продадеме куќата и да заминеме во Бразил. Ете му ја на Љубе Македонија!



Дали сериозно размислувате да ја напуштите земјава засекогаш?

Да. И во време кога се случуваа раштанскиските настани и во перидот кога Љубе беше во Хаг. Сиве овие години се трудев од петни жили да не се распадне семејството. Веќе сме во брак 22 години и многу сум уморна и истоштена.