Прва приватна специјална болница за нефрологија и дијализа

„Дијамед“ е сместена во комплетно реновирани простории во Ѓорче Петров

Снежана Калабакова

„Дијамед“ е новата приватна специјална болница за нефрологија и дијализа, која денеска се отвора во населбата Ѓорче Петров. Болницата е сместена во комплетно реновираните простории на поранешната матична служба со вкупна површина од 750 метри. Новата специјална болница располага со 25 дијализни места, со вкупен капацитет од 150 пациенти. Во текот на дијализата за пациентите ќе се грижи искусен медицински персонал.

Оваа болница ќе овозможи повеќе видови здравствена заштита од областа на интерната медицина, со посебен акцент на нефрологија и дијализно лекување. Располага со амбулантно-поликлинички дел, хируршка сала, дневна болница и сопствена биохемиска лабораторија. Опремата е од реномирана јапонска компанија НИПРО - Осака, која воедно е и инвеститор во болницата. Станува збор за позната јапонска фирма производител на опрема за дијализа, чие главно седиште е во Брисел. „Дијамед“ се претставници за Европа. Целокупната инвестиција во болницата во Ѓорче Петров изнесува еден и пол милион евра. Ова е прва приватна болница од ваков тип што располага со медицинска опрема со највисоки стандарди и со професионален домашен медицински кадар. Болницата најавува дека ќе потпише договор со Фондот за здравство, а веќе за дијализа се пријавени 92 пациенти.

„Целите поставени пред Специјалната болница за нефрологија со дијализа ’Дијамед‘ се да се постават нови современи стандарди во дијализната терапија во Македонија. Со ова ќе се обезбедат достоинствени услови за лекување, како и ефикасна и квалитетна дијализа со професионален однос кон пациентите. Се надеваме дека ова ќе биде модел што ќе придонесе за подобрување на стандардите за дијализа во сите центри на Македонија. Ние не сме центар за дијализа, туку болница за нефрологија и хемодијализа во која ќе се применуваат највисоки стандарди, меѓу другото, и за спречување на интерхоспиталните инфекции кај пациентите“, вели медицинскиот директор на болницата, д-р Љупчо Стојковски.

Оваа приватна здравствена установа има дневна болница, со посебна гардероба, тоалет и туш-кабина за пациентите. Салите за хемодијализа се издвоени, а има и ВИП-сала за странци било да станува збор за дипломати или за странски туристи.