Приказната од Преспа се повтори во Атина

Папандреу и Друцас пред Милошоски во Атина ги повторија грчките позиции

Димитар Чулев

Нема позитивни сигнали за „напредок“ во разврската на грчко-македонскиот спор околу името и се' поизвесно станува дека на 7 декември ЕУ тешко ќе може да и' понуди датум за преговори на Македонија.

На одвоените средби на шефот на македонската дипломатија Антонио Милошоски со грчкиот премиер и колега Јоргос Папандреу и со неговиот заменик Димитрис Друцас, грчката страна ги повтори грчките позиции во однос на прашањето за името. На маса, како што дознаваме, биле ставени прашањето на идентитетот и тоа за јазикот, каде што Грција би сакала да интервенира, иако пред јавноста и пред меѓународната политика официјално се зборува само за разговори за разликите околу името што се водат со посредство на ОН и за што медијаторот Метју Нимиц има мандат.

Оцена на министерот Милошоски по средбата било дека нема разлика во позициите на Грција во врска со аспирациите на Македонија за почеток на преговорите со ЕУ, пренесе МИА од Атина. Милошоски допатува во главниот град на Грција на Министерскиот состанок на ОБСЕ, што беше и можност да се сретне со првите луѓе на грчката дипломатија само три дена по тет-а-тет средбата на Папандреу со Груевски во Преспа.

Слично на апелот на македонскиот премиер, Милошоски на домаќините им порачал дека пред претстојниот самит на ЕУ, на кој треба да се одлучува за датум за преговори, од Грција се очекува „да размисли за своите чекори и да биде прагматична“ во однос на евроинтеграцијата на Македонија.

„Попречувањето нема да биде полезно за ниту една од страните, како и за процесот што се води во ОН“, изјавил Милошоски за македонските новинари што го следат во Атина. Околу можноста прашањето за давањето датум на Македонија и воопшто да не се најде на дневен ред, министерот е со став дека тоа ќе го наруши кредибилитетот на Унијата и на Европската комисија, која препорача отворање на пристапните преговори. Тој смета дека „шведското претседателство и земјите-членки на ЕУ и ЕК би требало да имаат голем интерес она што е препорачано од ЕК да биде дел од расправата и од политичките одлуки што треба да ги донесе Европскиот совет“.

Нема информации кој е македонскиот контрастав во однос на предложеното од грчката страна, односно дали македонската страна на маса дала „понуда што не може да ја одбие Грција“, а која би се однесувала само на промена на уставното име на земјава. Зад советите што доаѓаат од меѓународната заедница јасно се крие пораката дека Македонија мора да направи отстапка, што би го отворила патот кон деблокирање на членството на Македонија во НАТО, а сега и во ОН.

Но, како што пренесе МИА, Милошоски на средбите со Папандреу и со Друцас повел две иницијативи за унапредување на односите меѓу двете земји: за подигнување на нивото на дипломатски односи, односно канцелариите за врски во Скопје и во Атина да прераснат во амбасади, а втората за потпишување договор за избегнување на двојното оданочување, иницирана од грчките стопанственици што инвестирале во Македонија. Милошоски на домаќините, кои рекле дека сериозно ќе ги разгледаат предлозите, им порачал дека за нивна реализација не мора да се чека решението за спорот. Напротив, тие предлози можат да помогнат во зацврстувањето на билатералните односи и ќе се направи исчекор во однос на решавањето на главното прашање - за името.

„Секоја средба со претставници од Скопје е можност да се создаде позитивна клима во односите“, изјавил Друцас по средбата со Милошоски и, како што пренесе агенцијата АНА, тој не ја исклучил можноста да го посети Скопје во својство на претседавач на ОБСЕ, нешто што досега и тој и претходничката Дора Бакојани го избегнуваа. Кога ќе се случи тоа, со оглед на тоа што претседавањето на Грција со ОБСЕ завршува до крајот на оваа година е нејасно.

Вчера, Милошоски се обрати на пленарниот состанок на Министерскиот состанок на ОБСЕ, на кој учествуваат 50-тина шефови на дипломатиите. Како што пренесе МИА, тој зборуваше на тема „Принципите на Хелсинки отсликани во духот на Атина“. Истакнувајќи го значењето на овој состанок, кој е пресвртница за ОБСЕ, Милошоски рече дека Република Македонија го поддржува т.н. Крфски процес почнат на иницијатива на претседавачот Грција во јуни годинава на неформалниот состанок на Организацијата, како стратешки дијалог за ревитализација на нејзината улога во однос на европските безбедносни прашања.

Милошоски во целиот говор користел Република Македонија што не предизвика никакви реакции од домаќините. (Д.Ч.)