Македонија замина од Ирак, следна мисија Авганистан
Во мисијата во Ирак учествуваа 479 мировници
Светлана Унковска
„Додека бевме во Ирак беше добро, поминавме добро и најважно е дека живи и здрави се вративме дома и сега продолжуваме понатаму, најверојатно, во Авганистан. Далечината од семејството ни беше најтешкото нешто и сега е добро да се биде дома по толку време“, вака водникот Блашко Каранфилов накусо го опиша своето учество во 11-тата и последна ротација во „Слобода за Ирак“ на вчерашната свеченост по повод завршувањето на мисијата.
Но, и покрај тоа што сите велат дека биле задоволни од соработката што ја имале со другите војници од сојузничките сили, сепак, на прво место им е радоста што повторно се дома, со своите најблиски.
Македонските „волци“ и „ренџери“ изминативе пет и пол години беа дел од коалициските сили предводени од САД и заедно со последниот контингент нашата земја во оваа мисија учествуваше со 479 војници, припадници на најелитните армиски единици, на кои им беа доделени четири сребрени ѕвезди и околу 100 медали.
Пред построените единици, вчера почест и признание за успешно извршените задачи, високиот професионализам и одговорност, им оддаде државниот врв, првите луѓе во одбраната и американскиот амбасадор Филип Рикер.
Заедничка оцена беше дека македонските мировници најдостојно ја претставиле на Македонија и ги бранеле нејзините интереси и дека се нејзини вистински амбасадори, а беше нагласена и решеноста на земјава да го продолжи патот кон полноправно членство во НАТО.
Шефот на државата и врховен командант на вооружените сили, Бранко Црвенковски, посакувајќи им добро здравје, среќа и натамошни успеси, нагласи дека тој при неговата посета во воената база во Таџи и лично се уверил во силата на нивното единство, посветеност на работата и љубовта спрема земјата.
„Најдобрата потврда за успешноста на реформските процеси ја добивме на самитот на НАТО во Букурешт кога сите земји-членки, без исклучок, констатираа дека Македонија ги исполни критериумите за членство, меѓутоа од познати политички причини, главната цел не беше постигната. Но, Македонија ниту се откажала од својата намера да се интегрира во НАТО, ниту пак треба да се от��аже и да бара алтернативни начини за посилна заштита на својот територијален суверенитет и интегритет“, истакна претседателот Црвенковски.
Премиерот Никола Груевски рече дека АРМ денеска претставува професионална, добро обучена, ефикасна структура, компатибилна со стандардите на демократските држави и со стандардите на НАТО. Упатувајќи честитки за нивната храброст, пожртвуваност и патриотизам, тој порача дека токму со оваа посветеност покажавме дека сме целосно подготвени да ги споделиме обврските и одговорностите на меѓународната заедница во градењето на мирот и слободата.
„Македонија докажа дека е држава чија армија е високоспособна и дека заслужува да го добие местото што и' одговора на стандардите кон кои се стреми, а тоа е членството во НАТО“, рече Груевски.
Министерот за одбрана, Зоран Коњановски, истакна дека со учеството во мисијата Македонија се стави во одбрана против сите можни закани од глобалниот тероризам. „Учествувавме во глобален светски процес каде што со голема политичка и војничка храброст бевме дел од остварувањето на мисија, чии резултати се гледаат и сега“, нагласи Коњановски.
Според началникот на ГШ на АРМ, Мирослав Стојановски, АРМ постигнатиот успех во мисијата ќе беше невозможен без упорноста и подготвеноста на македонските војници.
„Македонските ’волци’ и ’ренџери’, рамо до рамо со војниците на САД покажаа храброст и висок степен на обученост и професионализам, со што од самиот почеток ги импресионираа странските армии кои учествуваа во оваа тешка мисија“, потенцира Стојановски.
Амбасадорот на САД во Македонија, Филип Рикер, обраќајќи им се на војниците на македонски јазик, рече дека тој претходно работел во амбасадата на САД во Ирак и ја имал честа да се сретне токму со некој од македонските мировници.
„Јас лично слушнав таму од американските војници колку многу ја ценеа вашата заложба, вашиот професионализам и беспрекорна посветеност. Вие, наедно, бевте и амбасадори на Македонија и нејзиниот народ“, истакна Рикер. (Св.У.) |
