Викенд-ноќи полни со џез

Вечерва втор ден од Скопскиот џез-фестивал

По настапот на композиторот и пијанист Омар Соса, Италијанката Марија Пија де Вито, но и полноќната свирка со Јури Онинг и составот „Wired Paradise“, годишениот, „Скопје џез-фестивал“ продолжува со предвидената викенд-програма.

Вечерва од 20 часот во Универзална сала треба да настапува Лери Карлтон, тројниот добитник на наградата „Греми“ за гитарски перформанси, композиции и музички теми наменети за ТВ-серии. Откако го на��ушти џез-составот „Fourplay“, американскиот гитарист реши да се концентрира на соло-кариера. Петочната вечер ќе го донесе мандонилистот Хамилтон де Холанда, но и пејачката Пола Мореленбаум, која во „Хард рок“ ќе направи осврт на босановата, фузирајќи електроника и акустика.

На 23 октомври Универзална ќе биде домаќин на ансамблот „Flat Earth Society“. Биг-бендот е основан откако поранешниот архитект, кларинист, композитор и продуцент, Петар Вермеерш, формираше екипа од музичари што ќе носат звучен бран од различни стилови и авторски аранжмани. Белгијанците сцената ќе ја делат со пијанистката со неконвенционален џез-глас, Париша Бергер, позната по нејзините преработки на поп-песни, рок-нумери и необичниот вокабулар. По неа, полноќниот клупски дел во „Хард рок“ е резервиран за „The Ethnics“, свежиот проект на Кахил Ел’ Забар и Ернест Доукинс од САД.

Традиционално, „Скопје џез-фестивал“ завршува со норвешки музичари. Скандинавски претставници ќе бидат Фроде Халтли и Твенге Сеим, но и гитаристот Терје Рипдал со „Bergen Big Band“. Манифестација ќе финишира со џез-панк варијациите на „Aronas“, предводени од новозеландскиот пијанист Арон Отињон. (Б.Ш.)